ውዳሴ ማረያም ዘሐሙስ ቁጥር

ዉዳሴሃ ለእግዝእትነ ማርያም ድንግል ወላዲተ አምላክ ዘይትነበብ በዕለተ ኃሙስ።

ዕፀ እንተ ርእየ ሙሴ በነደ እሳት ዉስተ ገዳም ወአዕፁቂሃ ኢትዉዒ፡ ትመስል ማርያም ድንግል ዘእንበለ ርኲስ ተሰብአ እማኔሃ ቃለ አብ፡ ወኢያዉዐያ እሳተ መለኮቱ ለድንግል፡ እምድኅረ ውለደቶ ድንግልናሃ ተረክበ፡ ወመለኮቱ ኢተወለጠ ኮነ ወልደ ዕጓለ እምሕያዉ አምላክ ዘበአማን መጽአ ወአድኃነነ፡ ሰአሊ ለነ ቅድስት።

ናዐብየኪ ኩልነ ኦ እግዝእትነ ወላዲተ አምላክ እስመ ሣህልኪ ይኩን ላዕለ ኩልነ።

ትምክሕተ ኩልነ ድንግል ማርያም ወላዲተ አምላክ ዘበእንቲአሃ ተሥዕረ ዘቀዳሚ መርገም እንተ ኃደረት ዲበ ዘመድነ፡ በዕልወት ዘገበረት ብእሲት በልዐት እምዕፅ፡ ወበእንተ ሔዋን ተዐፅወ ኆኅተ ገነት፡ ወበእንተ ማርያም ድንግል ተርኅወ ለነ ዳግመ፡ ከፈለነ ንብላዕ እምዕፀ ሕይወት፡ ዘዉእቱ ሥጋሁ ለክርስቶስ ወደሙ ክቡር፡ በእንተ ፍቅረ ዚአነ መጸ ወአድኃነአነ፡ አይ ልቡና፡ ወአይ ነቢብ፡ ወአይ ሰሚዕ፡ ዘይክል አእምሮ ዝንቱ ምሥጢር መንክራተ ዘይትነበብ ላዕሌሃ፡ እግዚአብሔር መፍቀሬ ሰብእ ፩ዱ ዉእቱ ባሕቲቱ ቃለ አብ ዘሀሎ እምቅድመ ዓለም በመለኮቱ፡ እንበለ ሙስና እም፩ዱ አብ መጽአ ወተሰብአ ወልድ ዋሕድ እምቅድስት እሙ፡ እምድኅረ ወለደቶ ኢማሰነ ድንግልናሃ፡ ወበእንተዝ ግህደ ኮነት ከመ ወላዲተ ኣምላክ ይእቲ፡ ኦ ዕሙቅ ብዕለ ጥበቡ ለእግዘአብሔር ከርሥ ዘፈትሐ ላዕሌሃ ትለድ በፃዕር ወሕማም: ወኃዘነ ልብ፡ወኮነት ፈልፈለ ሕይወት ወወለደት ዘእንበለ ዘርአ ብእሲ ዘይስዕር መርገመ እምዘመድነ። ወበእንተዝ ንስብሖ እንዘ ንብል ስብሕት ለከ ኦ መፍቀሬ ሰብእ ኄር ወመድኃኔ ንፍሳቲነ፡ ሰእለ ለነ ቅድስት።

ኦ ዝ መንክር ወዕፁብ ኃይለ ከርሣ ለድንግል ወላዲተ አምላክ ዘእንበለ ዘርእ: ስምዐ ኮነ መልአክ ዘአስተርአዮ ለዮሰፍ እንዘ ይብል ከመዝ፡ እስመ ዘትወለድ እምኔሃ እመንፈስ ቅዱስ ቃለ እግዚአብሔር ዉእቱ ተሰብኣ ዘእምበለ ዉላጤ፡ ወለደቶ ማርያም ምክዕቢተ ዝንቱ ፍሥሓ፡ ወይቤ ትወልዲ ወልደ ወይሰመይ አማኑኤል ዘበትርጓሜኡ እግዚኣብሔር ምስሌነ፡ ወዓዲ ይስመይ ኢየሱስሃ ዘይድኅኖም ለሕዝቡ እምኃጢአቶም ያድኅነነ በኃይሉ ወይሥረይ ኃትጥያትነ እስመ ጥዩቀ አእምርናሁ ከመ አምላክ ዉእቱ፡ ዘኮነ ሰብአ ሎቱ ስብሐት እስከ ለዓለም፡ኦዝ መንክር ልደተ አምላክ እማርያም እምቅድስት ድንግል፡ ኣግመረቶ ለቃል ኢቀደሞ ዘርእ ለልደቱ ወኢአማሰነ በልደቱ ድንግልናሃ፡ እምኀበ ወፅአ ቃል ዘንበለ ድካም፡ ወእምድንግል ተወልደ ዘእምበለ ሕማም፡ ሎቱ ሰገዱ ሰብአ ሰገል፡ አምጽኡ ዕጣነ ከመ ኣምላክ ዉእቱ፡ ወርቀ እስመ ንጉሥ ዉእቱ፡ ወከርቤ ዘይትወሀብ ለሞቱ ማሕየዊ በእንቲኣነ ተወክፈ በፈቃዱ፡ ፩ዱ ዉእቱ ባሕቲቱ ኄር ወመፍቀሬ ሰብእ፡ ሰአሊ ለነ ቅድስት።

ኦዝ መንክር ነሥእ ፩ደ ዐፅመ እምገቦሁ ለአዳም ወለሐኮ እምኔሁ ብእሲተ ወኩሎ ፍጥረተ Ꮆዕጓለ እመሕያዉ፡ ተዉህበ እግዚእ ቃለ አብ ተሰብአ እምቅድስት ድንግል ወተሰምየ ኣማኑኤል ወበእንተዝ ንስአል ኀቤሃ ኩሎ ጊዜ ከመ ታስተሥሪ በእንቲአነ ኀበ ፍቁር ወልዳ፡ ኄርት ይእቲ በኀበ ኩሎሙ ቅዱሳን ወሊቃነ ጳጳሳት እስመ ኣምጽአት ሎሙ ዘኪያሁ ይጸንሑ፡ ወለነቢያትኒ ኣምጽአትሎሙ ለዘበእንቲኣሁ ተነበዩ፡ ወለሐዋርያትኒ ወለደት ሎሙ ዘሰበኩ በስሙ ዉስተ ኩሉ ኣጽናፈ ዓለም፡ ለሰማዕት ወለመሃይማን ወፅአ እምኔሃ ዘተጋደሉ በእንቲአሁ ኢየሱስ ክርስቶስ ብዕለ ጸጋ ጥበቡ ዘኢይትዐወቀ፡ንኅሥሥ ዕበየ ሣህሉ እስመ መጽአ ወአድኃነነ፡ ስአሊ ለነ ቅድስት።

መሐለ እግዚኣብሔር ለዳዊት በጽድቅ ወኢይኔስሕ፡ እስመ እምፍሬ ከርሥከ አነብር ዲበ መንበርከ፡ወሶበ ተወክፎ ዉእቱ ጽድቅ ከመ እምኔሁ ይትወለድ ክርስቶስ በሥጋ፡ ፈቀደ ይኅሥስ ወይርከብ ማኅደሮ ለእግዚአብሔር ቅ ል ወፈጸመ ዘንተ በዐቢይ ትጋህ፡ ወእምዝ ጸርሐ በመንፈስ ወይቤ፡ ናሁ ሰማዕናሁ በኤፍራታ ወማኅደሮ ለአምላክ ያዕቆብ፡ እንተ ይእቲ ቤተ ልሔም ዘኅረያ አማኑኤል ይትወለድ ዉስቴታ በሥጋ ለመድኃኒተ ዚአነ፡ ካዕበ ይቤላ ካልእ እምነብያት ወአንቲኒ ቤተ ልሔም ምድረ ኤፍራታ ኢትቴሐቲ እምነገሥተ ይሁዳ፡ እስመ እምኔኪ ይወፅእ ንጉሥ ዘይርዕዮሙ ለሕዝብየ እስራኤል፡ ኦዝ ነገር ለእሉ እለ ተነበዩ በእንተ ክርስቶስ ሎቱ ስብሓት፡ ምስለ ኄር አብሁ፡ ወመንፈስ ቅዱስ እምይእዜ ወእስከ ለዓለም፡ ሰአሊ ለነ ቅድስት።

ዳዊት ዘነግሠ ለእስራኤል አመ ይትነሥኡ ላዕሌሁ ዕልዋን። ፈትወ ይስተይ ማየ እምዓዘቅተ ቤተ ልሔም፡ ፍጡነ ተንሥኡ መላሕቅተ ሐራሁ ወተቃተሉ በዉስተ ትዕይንተ ዕልዋን፡ ወአምጽኡ ሎቱ ዉእተ ማየ ዝፈተወ ይሰተይ፡ወሶበ ርእየ ዉእቱ ጻድቅ ከመ አጥብዑ ወመጠዉ ነፍሶሙ ለቀትል በእንቲ አሁ፡ ከዐወ ዉእተ ማየ ወኢሰትየ እምኔሁ፡ ወእምዝ ተኈለቈ ሎቱ ጽድቅ እስከ ለዓለም፡ አማን መነኑ ሰማዕት ጥዕማ ለዛ ዓለም ወከዓዉ ደሞሙ በእንተ እግዚኣብሔር ወተዐገሡ ሞተ መሪረ በእንተ መንግሥተ ሰማያት፡ ተሣሃለነ በከመ ዕበየ ሣህልከ፡ ሰአሊ ለነ ቅድስት።

ኣሐዱ ዘእምቅድስት ሥላሴ፤ ርእዮ ትሕትናነ አጽነነ ሰማየ ሰማያት፡ መጽአ ወኀደረ ዉስተ ከርሠ ድንግል፡ ወኮነ ሰብአ ከማነ ዘእንበለ ኃጢአት ባህቲታ፡ ወተወልደ በቤተ ልሔም በከመ ሰበኩ ነቢያት፡ አድኃነነ ወቤዘወነ ወረስየነ ሕዝበ ዚአሁ፡ ሰአሊ ለነ ቅድስት።