ውዳሴ ማረያም ዘቀዳሚት ቁጥር

ዉዳሴሃ ለእግዚእትነ ማርያም ድንግል ወላዲተ አምላክ ዘትነበብ በዕለተ ቀዳሚት ሰንበት።

ንጽሕት ወቡርክት ወቅድስት በኩሉ እንተ ሐቀፈቶ ለእግዚእ በእራኃ ወኩሉ ፍጥረት ይትፌሥሑ ምስሌሃ እንዘ ይጸርሑ ወይበሉ፡ ሰአሊለነ ቅድስት።

ተፈሲሒ ኦ ምልእተ ጸጋ፡ ተፈሥሒ እስመ ረከብኪ ሞገሰ፡ ተፈሥሒ እግዚአብሔር ምስሌኪ።

ናስተበፅዕ ዕበየኪ ኦ ግርምት ድንግል፡ ወንፌኑ ለኪ ፍሥሐ ምስለ ገብርኤል መልአክ፡ እስመ እምፍሬ ከርሥኪ ኮነ መድኃኒተ ዘመነ፡ ወአቅረበነ ኅበ እግዚአብሔር አቡሁ፡ ሰአሊ ለነ ቅድስት።

ከመ ከብካብ ዘአልቦ ጥልቀት፡ መንፈስ ቅዱስ ኀደረ ላዕሌኪ ወኃይለ ልዑል ሰለለኪ፡ኦ ማርያም አማን ወለድኪ ቃለ ወልድ አብ ዘይነብር ለዓለም መጽአ ወአድኃነነ እምኃጢአት፡ ሰአሊ ለነ ቅድስት።

አንቲ ዉእቱ ዘመድ ዘእምሥርወ ዳዊት ወለድኪ ለነ በሥጋ መድኃኒነ ኢየሱስ ክርስቶስ፡ ዋሕድ ቃል ዘእምአብ ዘእምቅድመ ዓለም ህልዉ፡ ኀብአ ርእሶ ወነሥአ እምኔኪ አርአያ ገብር፡ ሰአሊ ለነ ቅድስት።

ኮንኪ ዳግሚተ ሰማይ ዲበ ምድር ኦ ወላዲተ አምላክ ዘእምበለ ርኩስ፡ ሠረቀ ለነ እምኔኪ ፀሕየ ጽድቅ፡ ወወለድኪዮ በከመ ትንቢተ ነቢያት ዘእንበለ ዘርእ ወኢሙስና፡ ሰአሊ ለነ ቅድስት።

አንቲ ዉእቱ ደብተራ እንተ ተሰመይኪ ቅድስተ ቅዱሳን፡ ወወስቴታ ታቦት በወርቅ ልቡጥ እምኩለሄ ወውስቴታ ጽላተ ኪዳን መሶበ ወርቅ እንተ መና ኅቡእ፡ ዘዉእቱ ወልደ እግዚአብሔር መጽአ ወኃደረ ኀበ ማርያም ድንግል፡ ዘእንበለ ርኩስ ተሰብአ እምኔሃ ቃ አብ ወወለደቶ ዉስተ ዓለም ለንጉሠ ሰብሕት፡ መጽአ ወአድኃነነ፡ ትትፌሣሕ ገነት እመ በግዕ ነባቢ፡ ወልደ አብ ዘይነብር ለዓለም፡ መጽአ ወአድኃነነ እምኃጢያት፡ ሰአሊ ለነ ቅድስት።

ተሰመይኪ እመ ለክርስቶስ ንጉስ፡ እምድኅረ ወለድኪ ኪያሁ ነበርኪ በድንግልና በመንክር ምሥጢር ወለድኪዮ ለአማኑኤል፡ ወበእንተዝ ዐቀበኪ እንበለ ሙስና፡ ሰአለ ለነ ቅድስት።

አንቲ ዉእቱ ሰዋስዉ ዘርእየ ያዕቆብ እግዚአብሔር ላዕሌሁ እስመ ፆአኪ በከርሥኪ ኅቱም ዘኢይትዓወቅ እምኩለሄ፡ ኮንኪ ለነ ሰአሊተ ኅበ እግዚእነ ወመድኃኒነ ኢየሱስ ክርስቶስ ዘተሰብአ እምነኪ በእንተ መድኃኒትነ፡ ሰአሊ ለነ ቅድስት።

ናሁ እግዚእ ወጽአ እምኔኪ ኦ ቡርክት ጽርሕ ንጽህት፡ ያድኅን ኩሎ ዓለመ ዘፈጠረ በዕበየ ሣህሉ ንሰብሖ ወንወድሶ እስመ ዉእቱ ኄር ወመፍቀሬ ሰብእ፡ ሰአሊ ለነ ቅድስት::

ተፈሥሒ ኦ ምልእተ ጸጋ ድንግል ዘእንበለ ርኩስ ልሕኩት ንጽሕት ክብረ ኩሉ ዓለም፡ ብርሃን ዘኢትጠፍእ፡ መቅደስ ዘኢትትነሠት፡ በትረ ሃይማኖት ዘኢትጸንን፡ ምስማኮሙ ለቅዱሳን፡ ሰአሊ ለነ ኀበ ወልድኪ ኄር መድኃኒነ ይምሐረነ ወይሣሃለነ ይሥረይ ኃጢአተነ፡ ሰአሊ ለነ ቅድስት።