ውዳሴ ማረያም ዘእሁድ ቁጥር

ውዳሴሃ ለእግዝእትነ ማርያም ድንግል ወላዲተ አምላክ ዘይትነበብ በዕለተ ሰንበት ክርስቲያን ቅድስት።

ተሰመይኪ ፍቅርተ ኦ ቡርክት እምአንስት አንቲ ዉእቱ ዳግሚት ቀመር እንተ ተሰመይ ቅድስተ ቅዱሳን ወዉስቴታ ጽላተ ኪዳን፡፲ቱ ቃላት እለ ተጽሕፋ በአፃብዒሁ ለእግዚአብሔር ቀዲሙ ዜነወነ በየዉጣ እንተ ይእቲ ቀዳሜ ስሙ ለመድኃኒነ ኢየሱስ ክርስቶስ ዘተሰብአ እምኔኪ ዘእንበለ ዉላጤ፡ወኮነ ዓራቄ ለሐዲስ ኪዳን፡ በዉኂዘ ደሙ ቅዱስ አንጽሐሙ ለመሃይምናን ወለሕዝብ ዝጹሐን፡ ሰአሊ ለነ ቅድስት።

ወበእንተዝ ናዐብየኪ ኩልነ፡ ኦ እግእዝእትነ ወላዲተ አምላክ ንጽሕት ኩሎ ጊዜ ንስእል ወናን ቀዐዱ ኀቤኪ፡ ከመ ንርክብ ሣህለ በኀበ መፍቀሬ ሰብእ።

ታቦት በወርቅ ልቡጥ እምኩለሄ ዘግቡር እምዕፅ ዘኢይትቅዝ ይትሜሰል ለነ ዘእግዚአብሔር ቃለ ዘኮነ ሰብአ ዘእንበለ ፍልጠት ወኢዉላጤ፡ መለኮት ንጹሕ ዘአልቦ ሙስና ዘዕሩይ ምስለ አብ ወቦቱ አብሠራ ለንጽሕት፡ ዘእንበለ ዘርእ ኮነ ከማነ በኪነ ጥበቡ ቅዱስ፡ ዘተሰብአ እምነኪ ዘንበለ ርኩስ፡ ደመረ መለኮቶ፡ ሰአሊ ለነ ቅድስት።

መቅደስ ዘይኬልልዋ ኪሩቤል እለ ሥዑላን በሥዕለ እግዚአብሔር፡ ቃል ዘተሰብአ እምኔኪ ዘእንበለ ዉላጤ ኮነ ሠራዬ ኃጥአትነ ወደ ምሳሴ አበሳነ፡ ሰአሊ ለነ ቅድስት።

አንቲ ዉእቱ መሶበ ወርቅ ንጹሕ እንተ ዉስቴታ መና ኅቡእ፡ ኅብስት ዘወረደ እምሰማያት ወሀቤ ሕይወት ለኩሉ ዓለም፡ ሰአሊ ለነ ቅድስት።

እንቲ ዉእቱ ተቅዋም ዘወርቅ እንተ ፆርኪ ማኅቶተ ፀዳል ኩሎ ጊዜ፡ ዘዉእቱ ብርሃኑ ለዓለም፡ ብርሃን ዘእምብርሃን ዘአልቦ ጥንት፡ አምላክ ዘእምአምላክ ዘበአማን፡ ዘተሰብአ እምኔኪ ዘእንበለ ዉላጤ፡ ወበምጽአቱ አብርሃ ላዕሌነ ለእለ ንነብር ዉስተ ጽልመት ወጽላሎቱ ሞት፡ ወአርአትዐ እገሪነ ዉስተ ፍኖተ ሰላም:በምሥጢረ ጥበቡ ቅዱስ፡ ሰአሊ ለነ ቅድስት።

አንቲ ዉእቱ ማዕጠንት ዘወርቅ፡ እንተ ፆርኪ ፍሕመ እሳት፡ ብሩክ ዘነሥአ እመቅደስ ዘይሠሪ ኃጢአተ ወይደመሰስ ጌጋየ፡ ዝ ዉእቱ ዘእግዚአብሔር ቃል ዘተሰብአ እምኔኪ ዘአዕረገ ለአቡሁ ርእሶ ዕጣነ ወመሥዋዕተ ሥሙረ፡ ሰአሊ ለነ ቅድስት።

ተፈሥሒ ኦ ማርያም ርግብ ሠናይት፡ ዘወለድኪ ለነ ዘእግዚአብሔር ቃለ፡ አንቲ ዉእቱ ጽጌ መዓዛ ሠናይ እንተ ሠረፀት እምሥርወ ዕሤይ፡ ሰአሊ ለነ ቅድስት።

በትረ አሮን እንተ ሠረፀት ዘኢንበለ ተክል ወኢሠቀይዋ ማየ፡ ከማሃ አንቲኒ ኦ ወላዲተ ክርስቶስ አምላክነ ዘበአማን ዘእንበለ ዘርእ መጽአ ወአድኃነነ፡ ሰአሊ ለነ ቅድስት።

ለኪ ይደሉ ዘእምኩሎሙ ቅዱሳን ትስአሊ ለነ ኦ ምልእተ ጸጋ አንቲ ተዐብዪ እምሊቃነ ጳጳሳት ወፈድፍደ ትከብሪ እምነቢያት ብኪ ግርማ ራእይ ዘየዐቢ እምግርማ ሱራፌል ወኪሩቤል፡ አንቲ በአማን ምክሐ ዘመድነ ወሰአሊት ሕይወተ ለነፍሳቲነ ሰአሊ ለነ ኀበ እግዚእነ ወመድኃኒነ ኢየሱስ ክርስቶስ፡ ያፅንዐነ በርትዕት ሃይማኖት ዉስተ አሚነ ዚአሁ፡ ይጸግወነ ሣህሎ ወምሕረቶ፡ ይሥረይ ኃጢአተነ በብዝኀ ምሕረቱ፡ ሰአሊ ለነ ቅድስት።

ወበእንተዝ ናዓብየኪ ኩልነ ኦ እግዝእትነ ወላዲተ አምላክ ንጽሕት ኩሎ ጊዜ፡ ንስእል ወናንቀዐዱ ኀቤኪ ከመ ንርከብ ሣህለ በኀበ ወፈቀሬ ስብእ።

ጸሎታ ለማርያም ወስእለታ ያድኅነነ እመዓተ ወልዳ።

ጸሎታ ለማርያም ወስእለታ ለርእሰ ሊቃነ ጳጳሳት እገሌ ..........ይዕቀቦ እመዓተ ወልድ።

ጸሎታ ለማርያም ወስእለታ ለመፍቀሬ አምላክ እገሌ............... ትእዕቀቦ እመዓተ ወልዳ።

ጸሎታ ለማርያም ወስእለታ ለሕዝበ ክርስትያን ይዕቀቦም እብመዓተ ወልዳ።

ጸሎታ ለማርያም ወስእለታ ለሀገረትነ ኢትዮጵያ ይዕቀባ እብመዓተ ወልዳ።

ጸሎታ ለማርያም ወስእለታ ለነፍሳተ ሙታን ታድኅኖሙ እመዓተ ወልዳ።