አንቀጸ ብርሃን በቁጥር - ዘኮንኪ

እንቲ ዉእቱ ዘኮንኪ ጽርሐ ቅድሳት ወመቅደሰ ቅድስተ ቅዱሳን ወመንጦላዕተ ብርሃን፡ ወመንበረ ስብሐት ዘኢይተረጎም፡ አስተማሰልናኪ ኦ ቅድስት ማርያም በመቅደሰ ቅድስተ ቅዱሳን፡ በእንተ ቅዱስ መንፈስ ዘመጽአ ላዕሌኪ፡ ወኃይለ ልዑል ጸለለኪ፡ ወመንጦላዕተ ብርሃንሰ በእንተ ዘተሠወረ ቃለ አብ ኢየሱስ ክርስቶስ መድኃኒነ ዉስተ ከርሥኪ፡ እግዚአ ኩሉ ዘመልዕልት፡ ዘይሴብሕዎ መላእክት ወሊቃነ መላእክት አጋእዝት ወሥልጣናት ኃይላት ወመናብርት ወመኳንንት። ወሶበ ወለድኪ ወልደኪ በዲበ ምድር በውስተ ጎል ከለሉኪ ኪሩቤል እለ ብዙኃት አዕንቲሆሙ፡ ወሱራፌል እለ ስድስቱ ክነፈሆሙ፡ ወደመናተ ብርሃን ዖዱኪ፡ሊቃነ መላእክት ወሠራዊተ መላእክት ወሐራ ሰማይ ቆሙ ቅድሜኪ በፍርሃት ወበረዓድ፡ ወበህየ በካልእ ስብሐት ወደሱኪ ኪሩቤል ወሱራፌል ዘኢኮነ እምስብቲሆሙ ዘዉስተ ሰማያት ወኢ እምስብሐቲሆሙ ዘትካት፣ ወሶበ ርእዩ እግዚኦሙ ዘአስተጋብአ ኩሎ ፍጥረታት እንዘ ይነብር ዉስተ ኅፅንኪ፡ ወዘይሴሲ ለኩሉ ፍጥረት ይጠቡ ሐሊበኪ ከመሕፃን፡ ኅሠሥዎ ውስተ አርያም ወበህየ ረከብዎ ምስለ አቡሁ ወመንፈስ ቅዱስ ከመ ትካት፡ ወሶበ ርእዩ ትሕትናሁ ለእግዚኦሙ አልዐሉ አዕይንቲሆሙ ላዕለ ውስተ አርያም፡ ሰፍሑ ክነፈሆሙ ወሰብሑ ለእግዚኦም እንዘ ይብሉ ስብሐት ለከ እግዚአ ኩሉ በሰማያት፡ ወዓዲ ርአዩኪ በውስተ በዓት ለኪ ለባሕቲትኪ ምስለ ሕፃንኪ ወይቤሉ ሰላም በዲበ ምድር፡ ወሶበ ርእዩ እንዘ ይለብስ ሥጋ ዚአነ ዘነሥአ እምኔኪ ሰገዱ እንዘ ይብሉ ለዕጓለ እመሕያዉ ሠምሮ። ዳዊት ነቢይ ተነበየ በመዝሙር እንዘ ይብል፡ እምሰማይ ሐወፀ እግዚአ ኩሉ ወእምድልዉ ጽርሐ መቅደሱ፡ ወርእየ ኩሎ ደቂቀ ዕጓለ እመሕያዉ፡ ፈተወ ንጉሥ ሥነኪ ወይቤ ዛቲ ይእቲ ምዕራፍየ ለዓለም፡ ዝየ አኃድር እስመ ኀረይክዋ፡ ወልድኪ ሣህሎ ይክፍለነ ሰአሊ ለነ ቅድስት።