መዝሙር 1

መዝሙራት ዘዳዊት ምዕራፍ ፩ ፍካሬ ዘጻድቃን ወዘኃጥኣን፤ መዝሙር ዘዳዊት ሀሌሉያ።

፩ ብፁዕ ብእሲ ዘኢሖረ በምክረ ረሲዓን፤ ወዘኢቆመ ውስተ ፍኖተ ኃጥኣን፤ ወዘኢነበረ ውስተ መንበረ መስተሳልቃን።

፪ ዘዳእሙ ሕገ እግዚአብሔር ሥምረቱ፤ ወዘሕጎ ያነብብ መዕልተ ወሌሊተ።

፫ ወየከውን ከመ ዕፅ እንተ ትክልት ኀበ ሙሓዘ ማይ፤ እንተ ትሁብ ፍሬሃ በበጊዜሃ።

፬ ወቈጽላኒ ኢይትነገፍ፤ ወኵሎ ዘገብረ ይፌጽም።

፭ አኮ ከመዝ ኃጥኣንሰ አኮ ከመዝ፤ ዳእሙ ከመ መሬት ዘይግሕፍ ነፍስ እምገጸ ምድር።

፮ ወበእንተዝ ኢይትነሥኡ ረሲዓን እምደይን፤ ወኢኃጥኣን ውስተ ምክረ ጻድቃን።

፯ እስመ ያአምር እግዚአብሔር ፍኖቶሙ ለጻድቃን፤ ወፍኖቶሙ ለኃጥኣን ትጠፍእ።