መዝሙር 76

መዝሙራት ዘዳዊት ምዕራፍ ፸፮ ፍጻሜ ዘስብሐት መዝሙር ዘአሳፍ ማኅሌት ዘበእንተ አሶርዮን።

፩ ተዐውቀ እግዚአብሔር በይሁዳ፤ ወዐቢይ ስሙ በእስራኤል።

፪ ወነበረ በሰላም ብሔሩ፤ ወማኅደሩሂ ውስተ ጽዮን።

፫ ወበህየ ሰበረ ኀይለ ቀስት፤ ወልታ ወኲናተ ወፀባኢተ። ወብህየ ሰበረ አቅርንተ።

፬ አንተ ታበርህ ምንክረ፤ እምአድባር ዘለዓለም። ደንገፁ ኵሎሙ አብዳነ ልብ

፭ ሐለሙ ሕልመ ወአልቦ ዘረከቡ ኵሉ ሰብእ ለብዕለ እደዊሁ።

፮ እምተግሣጽከ አምላከ ያዕቆብ፤ ደቀሱ ኵሎሙ እለ ይጼአኑ አፍራሰ።

፯ ወአንተሰ ግሩም አንተ፤ ወመኑ ይትቃወሞ ለመዐትከ።

፰ እምሰማይ ታፀምእ ፍትሐ ምድርኒ ፈርሀት ወአርመመት።

፱ ሶበ ተንሥአ እግዚአብሔር ለኰንኖ፤ ከመ ያድኅኖሙ ለኵሎሙ የዋሀነ ልብ።

፲ እስመ እምፈቃዱ የአምነከ ሰብእ፤ ወእምተረፈ ሕሊናሁ ይገብር በዓለከ።

፲፩ ብፅኡ ወሀቡ ለእግዚአብሔር አምላክነ ወኵሎሙ እለ ፀውዱ ያበውኡ አምኃ ለግሩም።

፲፪ ዘያወፅእ ነፍሶሙ ለመላእክት፤ ወይገርም እምነገሥተ ምድር።