መዝሙር 95
መዝሙራት ዘዳዊት ምዕራፍ ፺፭ ስብሐተ ማኅሌት ዘዳዊት።
፩ ንዑ ንትፈሣሕ በእግዚአብሔር፤ ወንየብብ ለአምላክነ ወመድኀኒነ።
፪ ወንብጻሕ ቅድመ ገጹ በአሚን፤ ወበመዝሙር ንየብብ ሎቱ።
፫ እስመ ዐቢይ ውእቱ እግዚአብሔር አምላክነ፤ ወንጉሥ ዐቢይ ውእቱ ላዕለ ኵሉ አማልክት። እስመ ኢይገድፎሙ እግዚአብሔር ለሕዝቡ።
፬ እስመ ውስተ እዴሁ አጽናፈ ምድር፤ ወአድባር ነዋኃት ዚአሁ ውእቱ።
፭ እስመ እንቲአሁ ይእቲ ባሕር ወውእቱ ፈጠራ፤ ወለየብሰኒ እደዊሁ ገብራ። ንዑ ንስግድ ወንግነይ ሎቱ፤
፮ ወንብኪ ቅድመ እግዚአብሔር ዘውእቱ ፈጠረነ። እስመ ውእቱ አምላክነ፤
፯ ወንሕነሰ ሕዝቡ አባግዐ መርዔቱ፤ ዮም ለእመ ሰማዕክሙ ቃሎ። ኢታጽንዑ ልበክሙ
፰ ከመ አመ አምረርዎ በገዳም ወአመ አመከርዎ።
፱ ዘአመከሩኒ አበዊክሙ፤ ፈተኑኒ ወርእዩ መግባርየ።
፲ ወአርብዓ ዓመተ ተቈጣዕክዋ ለይእቲ ትውልድ ወእቤ ዘልፈ ይስሕት ልቦሙ፤
፲፩ ወእሙንቱሰ ኢያእመሩ ፍናውየ። በከመ መሐልኩ በመዐትየ፤ ከመ ኢይበውኡ ውስተ ዕረፍትየ።