መዝሙር 136

መዝሙራት ዘዳዊት ምዕራፍ ፻፴፮ ሀሌሉያ።

፩ ግነዩ ለእግዚአብሔር እስመ ኄር፤ እስመ ለዓለም ምሕረቱ።

፪ ግነዩ ለአምላከ አምልክት፤ እስመ ለዓለም ምሕረቱ።

፫ ግነዩ ለእግዚአ አጋእዝት፤ እስመ ለዓለም ምሕረቱ።

፬ ዘገብረ ዐቢየ መንክረ ባሕቲቱ፤ እስመ ለዓለም ምሕረቱ።

፭ ዘገብረ ሰማያተ በጥበቡ፤ እስመ ለዓለም ምሕረቱ።

፮ ዘአጽንዓ ለምድር ዲበ ማይ፤ እስመ ለዓለም ምሕረቱ።

፯ ዘገብረ ብርሃናተ ዐበይተ በሕቲቱ፤ እስመ ለዓለም ምሕረቱ።

፰ ለፀሐይ ዘአኰነኖ መዐልተ፤ እስመ ለዓለም ምሕረቱ።

፱ ለወርኅ ወለከዋክብተ ዘአኰነኖሙ ሌሊተ፤ እስመ ለዓለም ምሕረቱ።

፲ ዘቀተሎሙ ለግብጽ ምስለ በኵሮሙ፤ እስመ ለዓለም ምሕረቱ።

፲፩ ወአውፅኦሙ ለእስራኤል እማእከሎሙ፤ እስመ ለዓለም ምሕረቱ።

፲፪ በእድ ጽንዕት ወበመዝራዕት ልዕልት፤ እስመ ለዓለም ምሕረቱ።

፲፫ ዘነፈቃ ለባሕረ ኤርትራ ወከፈላ፤ እስመ ለዓለም ምሕረቱ።

፲፬ ወአውፅኦሙ ለእስራኤል እንተ ማእከላ፤ እስመ ለዓለም ምሕረቱ።

፲፭ ዘነፅኆ ለፈርዖን ወለኀይሉ ውስተ ባሕረ ኤርትራ፤ እስመ ለዓለም ምሕረቱ።

፲፮ ዘአውፅኦሙ ለሕዝቡ ውስተ ገዳም፤ እስመ ለዓለም ምሕረቱ። ዘአውፅአ ማየ እምኰኵሕ፤ እስመ ለዓለም ምሕረቱ።

፲፯ ዘቀተለ ነገሥተ ዐበይተ፤ እስመ ለዓለም ምሕረቱ።

፲፰ ወቀተለ ነገሥተ ጽኑዓነ፤ እስመ ለዓለም ምሕረቱ።

፲፱ ለሴዎን ንጉሠ አሞሬዎን፤ እስመ ለዓለም ምሕረቱ።

፳ ወለዖግ ንጉሠ ባሳን፤ እስመ ለዓለም ምሕረቱ።

፳፩ ወወሀበ ምድሮሙ ርስተ፤ እስመ ለዓለም ምሕረቱ።

፳፪ ርስተ እስራኤል ገብሩ፤ እስመ ለዓለም ምሕረቱ።

፳፫ እስመ ተዘከረነ እግዚአብሔር በሕማምነ፤ እስመ ለዓለም ምሕረቱ።

፳፬ ወአድኀነነ እምእደ ፀርነ፤ እስመ ለዓለም ምሕረቱ።

፳፭ ዘይሁብ ሲሳየ ለኵሉ ዘሥጋ፤ እስመ ለዓለም ምሕረቱ።

፳፮ ግነዮ ለአምላከ ሰማይ፤ እስመ ለዓለም ምሕረቱ።