መዝሙር 147

መዝሙራት ዘዳዊት ምዕራፍ ፻፵፯ ሀሌሉያ።

፩ ሰብሕዎ ለእግዚአብሔር እስመ ሠናይ መዝሙር፤ ወለአምላክነ ሐዋዝ ሰብሖ።

፪ የሐንጻ እግዚአብሔር ለኢየሩሳሌም፤ ወያስተጋብእ ዝርወቶሙ ለእስራኤል።

፫ ዘይፌውሶሙ ለቍሱላነ ልብ፤ ወይፀምም ሎሙ ቍስሎሙ።

፬ ዘይኌልቆሙ ለከዋክብት በምልኦሙ፤ ወይጼውዖሙ ለኵሎሙ በበአስማቲሆሙ።

፭ ዐቢይ እግዚአብሔር ወዐቢይ ኀይሉ፤ ወአልቦ ኍልቆ ጥበቢሁ።

፮ ያነሥኦሙ እግዚአብሔር ለየዋሃን፤ ወያኀስሮሙ ለኃጥኣን እስከ ምድር።

፯ ሰብሕዎ ለእግዚአብሔር በአሚን፤ ወዘምሩ ለአምላክነ በመሰንቆ።

፰ ዘይገለብቦ ለሰማይ በደመና ወያስተዴሉ ክረምተ ለምድር፤

፱ ዘያበቍል ሣዕረ ውስተ አድባር ወኀመልማል ለቅኔ እጓለ እመሕያው።

፲ ዘይሁቦሙ ሲሳዮሙ ለእንስሳ፤ ወለእጕለ ቋዓት እለ ይጼውዕዎ።

፲፩ ኢይፈቅድ ኀይለ ፈረስ፤ ወኢይሠምር በአቍያጸ ብእሲ።

፲፪ ይሠምር እግዚአብሔር በእለ ይፈርህዎ፤ ወበኵሎሙ እለ ይትዌከሉ በምሕረቱ።

፲፫ ትሴብሖ ኢየሩሳሌም ለእግዚአብሔር፤ ሰብሕዮ ለአምላክኪ ጽዮን።

፲፬ እስመ አጽንዐ መናስግተ ኆኃቲኪ፤ ወባረኮሙ ለውሉድኪ በውስቴትኪ።

፲፭ ወረሰየ ሰላመ ለበሓውርትኪ፤ ወአጽገበኪ ቄቅሐ ስርናይ።

፲፮ ዘይፌኑ ቃሎ ለምድር፤ ወፍጡነ ይረውጽ ነቢቡ።

፲፯ ዘይሁብ በረደ ከመ ፀምር፤ ወይዘርዎ ለጊሜ ከመ ሐመድ።

፲፰ ወያወርድ በረደ ከመ ፍተታት፤ መኑ ይትቃወሞ ለቍሩ።

፲፱ ይፌኑ ቃሎ ወይመስዎ፤ ያነፍኅ መንፈሶ ወያውሕዝ ማያተ።

፳ ዘነገረ ቃሎ ለያዕቆብ፤ ፍትሖ ወኵነኔሁ ለእስራኤል።

፳፩ ወኢገብረ ከማሁ ለባዕዳን አሕዛብ፤ ወኢነገሮሙ ፍትሖ።