ውዳሴ ማረያም ዘሰኑይ በዜማ

ዉዳሴሃ ለእግዝእትነ ማርያም ድንግል ወላዲተ ኣምላክ ዘይትነበብ በዕለተ ሰኑይ።

ፈቀደ እግዚእ: ያግዕዞ ለኣዳም ኅዙነ ወትኩዘ ልብ: ወያግብኦ ኅበ ዘትካት መንበሩ፡ ሰኣሊ ለነ ቅድስት።

ሠረቀ በሥጋእምድንግል ዘእንበለ ዘርኣ ብእሲ ወኣድኃነነ።

ለሔዋን እንተ ኣስሓተ ከይሲ: ፈትሓ ላዕሌሃ: እግዚኣብሔር እንዘ ይብል: ብዙኃ ወኣበዝኆ ለሕማምኪ ወለፃርኪ፡ ሠምረ ልቡ ኃበ ፍቅረ ሰብእ ወኣግዐዛ፡ ሰኣሊ ለነ ቅድስት።

ኢየሱስ ክርስቶስ:ቃል ዘተሰብኣ: ወኃደረ ላዕሌነ: ወርኢነ ስብሓቲሁ ከመ ስብሐተ ኣሐዱ ዋሕድ ለኣቡሁ: ሠምረ ይሣሃለነ፡ ሰኣሊ ለነ ቅድስት።

ርእየ ኢሳይያስ ነቢይ: በመንፈሰ ትንቢት ምሥጢሮ ለኣማኑኤል: ወበእንተዝ ጸርሐ እንዘ ይብል ሕፃን ተወልደ ለነ፡ ወልድ ተዉህበ ለነ፡ ሰኣሊ ለን ቅድስት።

ተፈሣሕ ወተኃሠይ:ኦ ዘመደ ዕጓለ እምሕያው እሰመ ኣፍቀሮ እግዚኣብሔር ለዓለም፡ ወመጠወ: ወልዶ ዋሕደ ከመ ይሕየዉ ኩሉ ዘየኣምን ቦቱ እሰከ ለዓለም፡ ፈነወ ለነ መዝራዕቶ ልዑል፡ ሰኣሊ ለነ ቅድስት።

ዘሀሎ ወይሄሉ ዘመጽኣ ወካዕበ ይምጽእ ኢየሱስ ክርስቶስ ቃል ዘተሰብኣ እምኔኪ:ዘእንበለ ዉላጤ፡ ኮነ ፍጹም ሰብኣ፡ ኢተባእደ: ወኢተፈልጠ በኩሉ ግብሩ ወልድ ዋሕድ፡ኣላ ኣሓዱ ራእይ፡ ወኣሐዱ ህላዌ ወኣሐዱ በመለኮት: ዘእግዚኣብሔር ቃል፡ ሰኣሊ ለነ ቅድስት።

ተፈሥሒ ኦ ቤተ ልሔም: ሀገሮሙ ለነብያት: እስመ በኃቤኪ ተወልደ ክርስቶስ: ዳግማይ ኣዳም: ከመ ያግብኦ ለኣዳም: ቀዳሚ ብእሲ እምድር ዉስተ ገነት ይሥዐር ፍትሐ ሞት፡ ኦ ኣዳም መሬት ኣንተ ወትገብእ ዉስተ መሬት፡ ኅበ ሀለወት: ብዝኅት ኃጢኣት በህየ ትበዝኅ: ጸጋ እግዚኣብሔር፡ሰኣሊ ለነ ቅድስት።

ትትፌሣሕ ወትትሓሠይ:ኩሉ ነፍስተ ሰብእ፡ ምስለ መላእክት ይሰብሕዎ ለክርስቶስ ንጉስ: ይጸርሑ ወይበሉ: "ስብሓት ለእግዚኣብሔር በሰማያት፡ ወሰላም በምድር ሥምረቱ ለሰብእ"፡ እሰመ ሠዐረ ዘትካት :ወነሠተ ምክሮ ለጸላኢ፡ ወሠጠጠ: መጽሐፈ ዕዳሆሙ: ለኣዳም ወለሔዋን፡ ወረሰዮሙ ኣግዐዝያነ ዘተወልደ ለነ በሀገረ ዳዊት: መድኃኒነ ኢየሱስ ክርስቶስ፡ ሰኣሊ ለነ ቅድስት።

ብርሃን ዘበኣማን: ዘያበርህ ለኩሉ ሰብእ ለእለ ይነብሩ ዉስተ ዓለም፡በእንተ ፍቅረ ሰብእ መጸእከ :ዉስተ ዓለም :ወኩሉ ፍጥረት ተፈሥሐ በምጽኣትከ፡ እስመ ኣድኃንኮ ለኣዳም እምስሕተት፡ ወረሰይካ ለሔዋን ኣግዓዚተ: እምፃዕረ ሞት :ወወሀብከነ መንፈሰ ልደት፡ ባረክናከ: ምስለ መላእቲከ፡ ሰኣሊ ለነ ቅድስት።