ውዳሴ ማረያም ዘሠሉስ በዜማ

ዉዳሴሃ ለእግዝእትነ ማርያም ድንግል ወላዲተ ኣምላክ ዘይትነበብ በዕለተ ሠሉስ።

አክሊለ ምክሕነ ወቀዳሚተ መድኃኒትነ ወመሰረተ ንጽሕነ ኮነ በማርያም ድንግል፡ እንተ ወለደት ለነ እግዚኣብሔር ቃለ፡ ዘኮነ ሰብኣ በእንተ መድኃኒትነ፡ እምድኅረ ኮነ ሰብአ ጥዩቀ ኣምላክ ፍጹም ዉእቱ፡ ወበእንተዝ ወለደቶ እንዘ ደንግል ይእቲ መንክር ኃይለ ወሊዶታ ዘኢይትነብር፡ሰአሊ ለነ ቅድስት።

እስመ በፈቃዱ ኣቡሁ፡ ወመንፈስ ቅዱስ መጽኣ ወአድኃነነ። ዐቢይ ዉእቱ ስብሓተ ድንግልናኪ ኦ ማርያም ድንግል ፍጽምት፡ ረከብኪ ሞገስ እግዚኣብሔር ምስለኪ፡ ኣንቲ ዉእቱ ሰዋስዉ ዘርእየ ያዕቆብ እምድር ዘይበጽሕ እስከ ሰማይ፡ ወመላክተ እግዚኣብሔር የዐርጉ ወይወርዱ ዉስቴታ፡ ሰኣለ ለነ ቅድስት።

አንቲ ዉእቱ ገራህት ዘኢተዘርአ ዉስቴታ ዘርእ፡ ወጽአ እምኔኪ ፍሬ ሕይወት፡ አንቲ ዉእቲ መዝገብ ዘተሣየጠ ዮሴፍ፡ ወረከበ በዉስቴታ ባሕርየ ዕንቈ ክቡረ፡ ዘዉእቱ መድኃኒነ ኢየሱስ ክርስቶስ ተፀዉረ በከርሥኪ ወወለድሊዮ ዉስተ ዓለም፡ ሰአሊ ለነ ቅድስት።

ተፈሥሒ ኦ ወላዲተ እግዚእ ኃሤቶም ለመላእክት፡ ተፈሥሒ ኦ ንጽሕት ዜናሆሙ ለነብያት፡ ተፈሥሒ እስመ ረከብኪ ሞገሰ እግዚአብሔር ምስለኪ፡ ተፈሥሒ እስመ ተወከፍኪ ቃሎ ለመልአኪ ፍስሐ ኩሉ ዓለም፡ ተፈሥሒ ኦ ወላዲተ ፈጣሬ ኩሉ ዓለም፡ ሰኣሊ ለነ ቅድስት።

ኦ ድንግል ኦ ቅድስት፡ ኦ ወላዲተ እግዚእ፡ እስመ ወለድኪ ለነ ንጉሠ፡ መንክር ምሥጢር ኃደረ ላዕሌኪ ለመድኃኒተ ዚአነ።ናርምም እስመ ኢንክል ፈፅሞ ጥንቁቀ ነጊረ፡ በእንተ ዕበዩ ለዉእቱ ገባሬ ሠናያት በብዙኅ መንከር ራእይ፡ ሰኣሊ ለነ ቅድስት።

ቃለ ኣብ ሕያዉ ዘወረደ ዉስተ ደብረ ሲና ወወሀበ ሕገ ለሙሴ፡ ወከደነ ርእሰ ደብር በጊሜ ዉጢስ በጽልመት ወነፋስ፡ ወበድምፀ ቃለ ኣቅርንት ይጌሥፅ ለእለ ይቀዉሙ በፍርሃት፡ ሰኣሊ ለነ ቅድስት።

ዉእቱኬ ዘወረደ ኅቤኪ፡ ኦ ደብር ነባቢት በትሕትና መፍቀሬ ሰብእ፡ ተሰብኣ እምኔኪ ዘእንበለ ዉላጤ ፍጹመ ሥጋ ነባቢ ዘከማነ፡ በመንፈሰ ጥበብ ኣምላክ ኃደረ ላዕሌሃ፡ ኮነ ፍጹመ ስብአ ከመ ያድኅኖ ወይሥረይ ኃጢአቶ ለኣዳም፡ ወያንብሮ ዉስጠ ሰማያት ወያግብኦ ኀበ ዘትካት መንበሩ፡ በዕበየ ሣህሉ ወምሕረቱ። ሰኣሊ ለነ ቅድስት።

ዕበያ ለድንግል ኢይትከሃል ለተነግሮ እስመ እግዚእ ኃረያ፡ መጽአ ወኃደረ ላዕሌሃ ዘየኃድር ዉስተ ብርሃን ኀበ አልቦ ዘይቀርቦ ተፀዉረ በከርሣ ፱ ተ አዉራኃ ዘኢይትረአይ ወዘኢትዓወቅ ወለደቶ ማርያም እንዘ ድንግል ይእቲ፡ ሰአሊ ለነ ቅድስት።

ዘዉእቱ እብን ዘርእየ ዳኒኤል ነቢይ፡ ዘተበትከ እምደብር ነዋኅ ዘእንበለ እድ፡ ዘዉእቱ ቃል ዘወዐኣ እምኀበ ኣብ መጽአ ወተሰብኣ እምድንግል ዘእንበለ ዘርኣ ብእሲ ወኣድኃነነ፡ ሰኣሊ ለነ ቅድስት።

ኮንኪ ዓፅቀ ንጹሐ ወሙዳየ አሚን፡ ርትዕት ሃይማንኖቶሙ ለቅዱሳን ኣበዊነ፡ ኦ ንጽሕት ወላዲተ ኣምላክ ድንግል ኅትምት ወለድኪ ለነ ቃለ አብ ኢየሱስ ክርስቶስ መጽአ ለመድኃኒትነ፡ሰአሊ ለነ ቅድስት።

አንቲ እሙ ለብርሃን ክብርት ወላዲት እግዚእ እንተ ፆርኪዮ ለቃለ ዘኢይትረአይ፡ እምድኅረ ወለድኪ ኪያሁ ነበርኪ በድንግልና፡ በስብሐት ወበባርኮት ያዐብዩኪ፡ ሰአሊ ለነ ቅድስት።

አይ ልሳን ዘይክል ነቢበ ዘይትነገር በእንቲአኪ ኦ ድንግል ንጽሕት እሙ ለቃለ ኣብ ኮንኪ መንበሮ ለንጉሥ ለዘይፀዉርዎ ኪሩቤል፡ ናስተበፅዐኪ ኦ ቡርክት፡ወንዘክር ስመኪ በኩሉ ትዉልደ ትዉልድ ኦ ርግብ ሠናይት እሙ ለእግዚእነ ኢየሱስ ክርስቶስ፡ ሰአሊ ለነ ቅድስት።

ተፈሥሒ ኦ ማርያም እም ወአመት፡ እሰመ ለዘዉስተ ሕፅንኪ ይሰብሕዎ መላእክት ወኪሩቤል ይሰግዳ ሎቱ በፍርሃት፡ ወሱራፌል ዘእንበለ ጽርዓት ይሰፍሑ ክነፈሆሙ ወይበሉ፡ ዝንቱ ዉእቱ ንጉሠ ሰብሐት መጽእ ይሥረይ ኃጢአተ ዓለም በዕበየ ሣህሉ ፡ሰኣሊ ለነ ቅድስት።