መዝሙረ ዳዊት9

መዝሙረ ዳዊት ምዕራፍ ፱ ፍጻሜ በእንተ ኅቡኣተ ወልድ፤ መዝሙር ዘዳዊት።

፩ እገኒ ለከ እግዚኦ በኵሉ ልብየ፤ ወእነግር ኵሎ ስብሓቲከ።

፪ እትፌሣሕ ወእትሐሠይ ብከ፤ ወእዜምር ለስምከ ልዑል።

፫ ሶበ ገብኡ ጸላእትየ ድኅሬሆሙ፤ ይድወዩ ወይትሐጐሉ እምቅድመ ገጽከ።

፬ እስመ ገበርከ ሊተ ፍትሕየ ወበቀልየ፤ ወነበርከ ዲበ መንበርከ መኰንነ ጽድቅ።

፭ ገሠጽኮሙ ለአሕዛብ ወተሐጕሉ ረሲዓን፤ ወደምሰስከ ስሞሙ ለዓለመ ዓለም።

፮ ፀርሰ ተገምሩ በኲናት ለዝሉፍ። ወአህጒሪሆሙኒ ነሠትከ፤

፯ ወትስዕር ዝክሮሙ ኅቡረ። ወእግዚአብሔር ይነብር ለዓለም፤

፰ ወአስትዳለወ መንበሮ ለኰንኖ። ወውእቱ ይኴንና ለዓለም በጽድቅ፤ ወይኴንኖሙ ለአሕዛብ በርትዕ።

፱ ወኮኖሙ እግዚአብሔር ምስካዮሙ ለነዳያን፤ ወረዳኢሆሙ ውእቱ በጊዜ ምንዳቤሆሙ።

፲ ወይትዌከሉ ብከ ኵሎሙ እለ ያፈቅሩ ስመከ፤ እስመ ኢተኀድጎሙ ለእለ የኀሡከ እግዚኦ።

፲፩ ዘምሩ ለእግዚአብሔር ዘየኀድር ውስተ ጽዮን፤ ወንግርዎሙ ለአሕዛብ ምግባሮ።

፲፪ እስመ ተዘክረ ዘይትኃሠሥ ደሞሙ፤ ወኢረስዐ ዐውያቶሙ ለነዳያን።

፲፫ ተሣሀለኒ እግዚኦ ወርኢ ዘከመ ያሐሙኒ ጸላእትየ፤

፲፬ ዘያሌዕለኒ እምአናቅጸ ሞት። ከመ እንግር ኵሎ ስብሓቲከ፤ በአናቅጺሃ ለወለተ ጽዮን፤

፲፭ ወንትፌሣሕ በአድኅኖትከ። ጠግዑ አሕዛብ በጌጋዮሙ ዘገብሩ፤

፲፮ ወበይእቲ መሥገርት እንተ ኀብኡ ተሠግረ እግሮሙ።

፲፯ ያአምር እግዚአብሔር ገቢረ ፍትሕ፤ ወበግብረ እደዊሁ ተሠግረ ኃጥእ።

፲፰ ያግብኡ ኃጥኣን ውስተ ሲኦል፤ ወኵሎሙ አሕዛብ እለ ይረስዕዎ ለእግዚአብሔር።

፲፱ እስመ አኮ ለዝሉፉ ዘይትረሳዕ ነዳይ፤ ወኢያሕጕሉ ትዕግሥቶሙ ነዳያን ለዓለም።

፳ ተንሥእ እግዚኦ ወኢይጽናዕ እጓለ እምሕያው፤ ወይትኴነኑ አሕዛብ በቅድሜከ።

፳፩ ሢም እግዚኦ መምህረ ሕግ ላዕሌሆሙ፤ ወያእምሩ አሕዛብ ከመ እጓለ እመሕያው እሙንቱ።