መዝሙረ ዳዊት21
መዝሙረ ዳዊት ምዕራፍ ፳፩ ፍጻሜ መዝሙር ዘዳዊት።
፩ እግዚኦ በኀይልከ ይትፌሣሕ ንጉሥ፤ ወብዙኀ ይትሐሠይ በአድኅኖትከ።
፪ ፍትወተ ነፍሱ ወሀብኮ፤ ወስእለተ ከናፍሪሁ ኢከላእኮ።
፫ እስመ በጻሕኮ በበረከት ሠናይ፤ ወአንበርከ አክሊለ ዲበ ርእሱ ዘእምዕንቍ ክቡር።
፬ ሐይወ ሰአለከ ወወሀብኮ፤ ለነዋኅ መዋዕል ለዓለመ ዓለም።
፭ ዐቢይ ክብሩ በአድኅኖትከ፤ ክብረ ወስብሐተ ወሰኮ።
፮ እስመ ወሀብኮ በረከተ ለዓለመ ዓለም፤ ወታስተፌሥሖ በሐሤተ ገጽከ።
፯ እስመ ተወከለ ንጉሥ በእግዚአብሔር፤ ወኢይትሀወክ በምሕረቱ ለልዑል።
፰ ትርከቦሙ እዴከ ለኵሎሙ ፀርከ፤ ወትትራከቦሙ እዴከ ለኵሎሙ ጸላእትከ።
፱ ወትረስዮሙ ከመ እቶነ እሳት ለጊዜ ገጽከ። እግዚኦ በመዐትከ ሁኮሙ፤ ወትብልዖሙ እሳት።
፲ ወፍሬሆሙኒ ሰዐር እምድር፤ ወዘርዖሙኒ እምእጓለ እመሕያው።
፲፩ እስመ ሜጥዋ ለዐመፃ ላዕሌከ፤ ወሐለዩ ምክረ እንተ ኢይክሉ አቅሞ።
፲፪ ወታገብኦሙ ድኅሬሆሙ፤ ወታስተደሉ ገጾሙ ለጊዜ መዐትከ።
፲፫ ተለዐልከ እግዚኦ በኀይልከ፤ ንሴብሕ ወንዜምር ለጽንዕከ።