መዝሙረ ዳዊት25

መዝሙረ ዳዊት ምዕራፍ ፳፭ መዝሙር ዘዳዊት።

፩ ኀቤከ እግዚኦ አንቃዕደውኩ ነፍስየ አምላኪየ ኪያከ ተወከልኩ ኢይትኀፈር ለዓለም፤

፪ ወኢይስሐቁኒ ጸላእትየ። እስመ ኵሎሙ እለ ይሴፈዉከ ኢይትኀፈሩ፤

፫ ለይትኀፈሩ ኵሎሙ እለ ይኤብሱ ዘልፈ።

፬ ፍኖተከ እግዚኦ አምረኒ፤ ወአሰረ ዚአከ ምህረኒ።

፭ ወምርሐኒ በጽድቅከ ወምህረኒ እስመ አንተ አምላኪየ ወመድኀኒየ፤ ወኪየከ እሴፎ ኵሎ አሚረ።

፮ ተዘከር ሣህለከ እግዚኦ ወምሕረተከኒ፤ እስመ ለዓለም ውእቱ።

፯ ኃጢአትየ ዘበንእስየ ወእበድየ ኢተዝክር ሊተ።

፰ ወበከመ ሣህልከ ተዘከረኒ፤ በእንተ ምሕረትከ እግዚኦ።

፱ ኄርኒ ወጻድቅኒ እግዚአብሔር፤ በእንተዝ ይመርሖሙ ፍኖተ ለእለ ይስሕቱ።

፲ ወይሜህሮሙ ፍትሐ ለየዋሃን፤ ወይኤምሮሙ ፍኖቶ ለልቡባን።

፲፩ ኵሉ ፍኖቱ ለእግዚአብሔር ሣህል ወጽድቅ፤ ለእለ የኀሡ ሕጎ ወስምዖ።

፲፪ በእንተ ስምከ እግዚኦ፤ ወስረይ ሊተ ኵሎ ኃጢአትየ እስመ ብዙኅ ውእቱ።

፲፫ መኑ ውእቱ ብእሲ ዘይፈርሆ ለእግዚአብሔር፤ ወይመርሖ ፍኖተ እንተ ኀርየ።

፲፬ ወነፍሱሂ ውስተ ሠናይ ተኀድር፤ ወዘርዑሂ ይወርስዋ ለምድር።

፲፭ ኀይሎሙ ውእቱ እግዚአብሔር ለእለ ይፈርህዎ፤ ወስሙሂ ለእግዚአብሔር ለእለ ይጼውዕዎ። ወሕጎሂ ይሜህሮሙ።

፲፮ አዕይንትየሰ ዘልፈ ኀበ እግዚአብሔር፤ እስመ ውእቱ ይባልሖን እመሥገርት ለእገርየ።

፲፯ ነጽር ላዕሌየ ወተሣሀለኒ፤ እስመ ባሕታዊ ወነዳይ አነ።

፲፰ ወብዙኅ ሐዘኑ ለልብየ፤ አድኅነኒ እምንዳቤየ።

፲፱ ርኢ ሕማምየ ወስራሕየ፤ ወኅድግ ሊተ ኵሎ ኃጢአትየ።

፳ ወርኢ ከመ በዝኁ ጸላእትየ፤ ጽልአ በዐመፃ ይጸልኡኒ።

፳፩ ዕቀባ ለነፍስየ ወአድኅና፤ ወኢይትኀፈር እስመ ኪየከ ተወከልኩ።

፳፪ የዋሃን ወራትዓን ተለዉኒ፤ እስመ ተሰፈውኩከ እግዚኦ።

፳፫ ያድኅኖ እግዚአብሔር ለእስራኤል እምኵሉ ምንዳቤሁ።