መዝሙረ ዳዊት41

መዝሙረ ዳዊት ምዕራፍ ፵፩ ፍጻሜ መዝሙር ዘዳዊት።

፩ ብፁዕ ዘይሌቡ ላዕለ ነዳይ ወምስኪን፤ እምዕለት እኪተ ያድኅኖ እግዚአብሔር።

፪ እግዚአብሔር ያዐቅቦ ወያሐይዎ ወያበጽዖ ዲበ ምድር፤ ወኢያገብኦ ውስተ እደ ጸላኢሁ።

፫ እግዚአብሔር ይረድኦ ውስተ ዐራተ ሕማሙ፤ ወይመይጥ ሎቱ ኵሎ ምስካቤሁ እምደዌሁ።

፬ አንሰ እቤ እግዚኦ ተሣሀለኒ፤ ወስረይ ላቲ ለነፍስየ እስመ አበስኩ ለከ።

፭ ጸላእትየሰ እኩየ ይቤሉ ላዕሌየ፤ ማእዜ ይመውት ወይሰዐር ስሙ።

፮ ወይባእ ወይርአይ ዘከንቶ ይነብብ ልቡ አስተጋብአ ኃጢአተ ላዕሌሁ፤

፯ ይወፅእ አፍአ ወይትናገር።

፰ ወየኀብር ላዕሌየ ወይትቃጸቡኒ ኵሎሙ ጸላእትየ፤ ወይመክሩ እኩየ ላዕሌየ፤

፱ ነገረ ጌጋየ አውፅኡ ላዕሌየ፤ ዘኖመሰ ኢይነቅህኑ እንከ።

፲ ብእሴ ሰላምየ ዘኪያሁ እትአመን ዘይሴስይ እክልየ፤ አንሥአ ሰኰናሁ ላዕሌየ።

፲፩ እንተ እግዚኦ ተሣሀለኒ ወአንሥአኒ እፍድዮሙ።

፲፪ ወበእንተዝ አእመርኩ ከመ ሠመርከኒ፤ ወኢተፈሥሑ ጸላእትየ ላዕሌየ።

፲፫ ወሊተሰ በእንተ የዋሀትየ ተወከፍከኒ፤ ወአጽናዕከኒ ቅድሜከ ለዓለም።

፲፬ ይትባረክ እግዚአብሔር አምላከ እስራኤል እምይእዜ ወእስከ ለዓለም፤ ለይኩን ለይኩን።