መዝሙረ ዳዊት55

መዝሙረ ዳዊት ምዕራፍ ፶፭ ፍጻሜ ስብሐት ዘበኣእምሮ ዘዳዊት።

፩ አፅምአኒ እግዚኦ ጸሎትየ፤ ወኢትትሀየየኒ ስእለትየ። ነጽረኒ ወስምዐኒ፤

፪ ተከዝኩ ወደንገፅኩ ወተዛዋዕኩ። እምቃለ ጸላኢ ወእምሥቃየ ኃጥእ፤

፫ እስመ ሜጥዋ ለዐመፃ ላዕሌየ ወቆሙ ላዕሌየ ያመንስዉኒ።

፬ ወደንገፀኒ ልብየ በላዕሌየ፤ ወመጽአኒ ድንጋፄ ሞት።

፭ ፍርሀት ወረዐድ አኀዘኒ፤ ወደፈነኒ ጽልመት።

፮ ወእቤ መኑ ይሁበኒ ክንፈ ከመ ርጌብ፤ እሥርር ወኣዕርፍ።

፯ ናሁ አርሐቁ ተኀጥኦ፤ ወቤትኩ ውስተ በድው።

፰ እሴፈዎ ለዘ ያድኅነኒ፤ እምዕንባዜ ነፍስየ ከመ ዐውሎ።

፱ አስጥሞሙ እግዚኦ ወምትር ልሳናቲሆሙ፤ እስመ ርኢኩ ዐመፃ ወቅሥተ ውስተ ሀገር።

፲ እስመ መዐልተ ወሌሊተ ዕጉት ውስተ አረፋቲሃ፤ ዐመፃ ወስራሕ ወኀጢአት ማእከላ።

፲፩ ወኢይርሕቅ እመርሕባ ጕሕሉት።

፲፪ ሶበሰ ጸላኢ ጸአለኒ እምተዐገሥኩ፤

፲፫ ውሶበሂ ጸላኢ አዕበየ አፉሁ ላዕሌየ እምተኀባእክዎ።

፲፬ ወአንተሰ ብእሲ ዘከመ ነፍስየ፤ ማእምርየ ወዐውቅየ።

፲፭ ዘኅቡረ አስተጠዐምከ ሊተ መባልዕተ፤ ወነሐውር ቤተ እግዚአብሔር በአሐዱ ልብ።

፲፮ ይምጽኦሙ ሞት ወይረዱ ውስተ ሲኦል ሕያዋኒሆሙ፤

፲፯ እስመ እኩይ ማእከሎሙ ውስተ አብያቲሆሙ።

፲፰ ወአንሰ ጸራኅኩ ኀበ እግዚአብሔር፤ ወአምላኪየ ሰምዐኒ።

፲፱ ሰርከ ወነግሀ ወመዐልተ እነግር ወኣየድዕ፤ ወይሰምዐኒ ቃልየ።

፳ አድኅና በሰላም ለነፍስየ እምእለ ይትቃረቡኒ፤ እስመ ይበዝኁ እምእለ ምስሌየ።

፳፩ ይስማዕ እግዚአብሔር ወያኅስሮሙ፤ ዘሀሎ እምቅድመ ይትፈጠር ዓለም።

፳፪ እስመ አልቦሙ ቤዛ ወኢፈርህዎ ለእግዚአብሔር። ወሰፍሐ እዴሁ ለፍድይ።

፳፫ ወአርኰሱ ሥርዐቶ። ወተናፈቁ እምዐተ ገጹ ወቀርበ ልቡ።

፳፬ ወጽሕደ እምቅብእ ነገሩ እሙንቱሰ ማዕበል ያስጥሙ።

፳፭ ግድፍ ላዕለ እግዚአብሔር ሕሊናከ ወውእቱ ይሴስየከ፤ ወኢይሁቦ ሁከተ ለጻድቅ ለዓለም።

፳፮ አንተ እግዚኦ አጽድፎሙ ውስተ ዐዘቅተ ሞት

፳፯ ዕድው ደም ወጽልሕዋን ኢይነፍቁ መዋዕሊሆሙ፤ ወአንሰ ተወከልኩከ እግዚኦ።