መዝሙረ ዳዊት57
መዝሙረ ዳዊት ምዕራፍ ፶፯ ፍጻሜ ኢታማስን ዘዳዊት አርአያ መጽሐፍ፤ ዘአመ ጐየ እምቅድመ ገጸ ሳኦል ውስተ በአት።
፩ ተሣሀለኒ እግዚኦ ተሣሀለኒ። እስመ ኪያከ ተወከለት ነፍስየ፤
፪ ወተወከልኩ በጽላሎተ ክንፊከ፤ እስከ ተኀልፍ ኀጢአት።
፫ እጸርኅ ኀበ እግዚአብሔር ልዑል፤ ኀበ እግዚአብሔር ዘረድአኒ።
፬ ፈነወ እምሰማይ ወአድኀነኒ ወወሀቦሙ ኀሳረ ለእለ ኬዱኒ፤
፭ ገነወ እግዚአብሔር ሣህሎ ወጽድቆ። ወአድኀና ለነፍስየ እምእከለ አናብስት ወኖምኩ ድንጉፅየ፤
፮ ደቂቀ እጓለ እምሕያው ስነኒሆሙ ሐጽ ወኲናት ወልሳኖሙኒ በሊኅ መጥባሕት።
፯ ተለዐለ እግዚአብሔር መልዕልተ ሰማያት፤ ወበኵሉ ምድር ስብሐቲሁ።
፰ መሥገርተ አስተዳለዉ ለእገርየ ወቀጽዕዋ ለነፍስየ፤
፱ ከሩዩ ግበ ቅድሜየ ወወድቁ ውስቴቱ።
፲ ጥቡዕ ልብየ እግዚኦ ጥቡዕ ልብየ፤ እሴብሕ ወእዜምር።
፲፩ ወይትንሣእ ክብርየ፤ ወይትንሣእ በመዝሙር ወበመሰንቆ፤ ወእትንሣእ በጽባሕ።
፲፪ እገኒ ለከ በውስተ አሕዛብ እግዚኦ፤ ወእዜምር ለከ በውስተ ሕዝብ።
፲፫ እስመ ዐብየት እስከ ሰማያት ምሕረትከ፤ ወእስከ ደመናት ጽድቅከ።
፲፬ ተለዐለ እግዚአብሔር መልዕልተ ሰማያት፤ ወበኵሉ ምድር ስብሓቲሁ።