መዝሙረ ዳዊት60
መዝሙረ ዳዊት ምዕራፍ ፷ ፍጻሜ ዘእለ ተበዐዱ ዓዲ፤ አርአየ መጽሐፍ ዘዳዊት ለትምህርት። ዘአመ አውዐየ መስጴጦምየ ዘሶርያ ወሶርያ ዘሶበል ወተመይጠ ዮአብ ወቀተለ በቈላቲሆም ካልኣን ዐሠርተ ወ ፪ ፻።
፩ እግዚኦ ገደፍከነ ወነሠትከነ፤ ቀሠፍከነሂ ወተሣሀልከነ።
፪ አድለቅለቃ ለምድር ወሆካ፤ ወፈወስከ ቍስላ እስመ ምንቀልቀለት።
፫ ወአርአይኮሙ ዕፁባተ ለሕዝብከ፤ ወአስተይከነ ወይነ መደንግፀ።
፬ ወወሀብኮሙ ትእምርተ ለእለ ይፈርሁከ፤ ከመ ያምስጡ እምገጸ ቀስት።
፭ ወይድኀኑ ፍቁራኒከ፤ አድኅን በየማንከ ወስምዐኒ።
፮ እግዚአብሔር ነበበ በመቅደሱ እትፌሣሕ ወእትካፈል ምህርካ፤ ወእሳፈር አዕጻደተ ቈላት።
፯ ዚአየ ውእቱ ገላዐድ ወዚአየ ምናሴ፤ ወኤፍሬም ምስማከ ርእስየ፤
፰ ወይሁዳ ንጉሥየ። ወሞአብ ካህን ተስፋየ
፱ ዲበ አደምያስ እሰፍሕ መካይድየ፤ ሊተ ይገንዩ ኢሎፍሊ።
፲ መኑ ይወስደኒ ሀገረ ጥቅም፤ ወመኑ ይመርሐኒ እስከ ኢዶምያስ።
፲፩ አኮኑ አንተ እግዚኦ ዘገደፍከነ፤ ወኢትወፅእ አምላክነ ምስለ ኀይልን።
፲፪ ሀበነ ረድኤተ በምንዳቤነ፤ ወከንቱ ተአምኖ በሰብእ።
፲፫ በእግዚአብሔር ንገብር ኀይለ፤ ወውእቱ ያኀስሮሙ ለእለ ይሣቅዩነ።