መዝሙረ ዳዊት75
መዝሙረ ዳዊት ምዕራፍ ፸፭ ፍጹሜ ኢታማስን መዝሙር ዘአሳፍ ማኅሌት።
፩ እገኒ ለከ እግዚኦ እገኒ ለከ ወእጼውዕ ስመከ፤
፪ ወእነግር ኵሎ ስብሐቲከ። ሶበ ረከብኩ ጊዜሁ፤ ወአንሰ ጽድቀ እኴንን።
፫ ተመስወት ምድር ወኵሎሙ እለ ይነብሩ ውስቴታ፤ ወአነ አጽናዕኩ አዕማዲሃ።
፬ ወእቤሎሙ ላኃጥኣን ኢየአብሱ፤ ወእለሂ ይኤብሱ ኢያንሥኡ ቀርኖሙ።
፭ ወኢያንሥኡ፤ ቀርኖሙ ውስተ አርያም፤ ወኢይንብቡ ዐመፃ ላዕለ እግዚአብሔር።
፮ እስመ ኢእምጽባሕ ወኢእምዐረብ ወኢእምአድባረ ገዳም እስመ እግዚአብሔር መኰንን ውእቱ፤
፯ ዘንተ ያኀስር ወዘንተ ያከብር። እስመ ጽዋዕ ውስተ እደ እግዚአብሔር ወይን ዘኢኮነ ቱሱሐ ዘምሉእ ቅድሐቱ፤
፰ ወሶጦ እምዝንቱ ውስተ ዝንቱ፤ ወባሕቱ ጣሕሉኒ ኢይትከዐው ወይሰትይዎ ኵሎሙ ኃጥኣነ ምድር።
፱ ወአንሰ እትፌሣሕ ለዓለም፤ ወእዜምር ለአምላከ ያዕቆብ።
፲ ወእሰብር አቅርንተ ኃጥኣን፤ ወይትሌዐል አቅርንተ ጻድቃን።