መዝሙረ ዳዊት105

መዝሙረ ዳዊት ምዕራፍ ፻፭ ሀሌሉያ።

፩ ግነዩ ለእግዚአብሔር ወጸውዑ ስሞ፤ ወንግርዎሙ ለአሕዛብ ምግባሮ።

፪ ሰብሕዎ ወዘምሩ ሎቱ፤ ወንግሩ ኵሎ መንክሮ። ወትከብሩ በስሙ ቅዱስ፤

፫ ለይትፌሣሕ ልብ ዘየኀሦ ለእግዚአብሔር። ኅሥዎ ለእግዚአብሔር ወትጸንዑ፤ ወኅሡ ገጾ በኵሉ ጊዜ።

፬ ወተዘከሩ መንክሮ ዘገብረ፤ ተኣምሪሁ ወኵነኔ አፉሁ።

፭ ዘርዐ አብርሃም አግብርቲሁ፤ ወደቂቀ ያዕቆብ ኅሩያኒሁ።

፮ ውእቱ እግዚአብሔር አምላክነ፤ ውስተ ኵሉ ምድር ኵነኔሁ።

፯ ወተዘከረ ሥርዐቶ ዘለዓለም፤ ቃሎ ዘአዘዘ ለዐሠርቱ ምእት ትውልድ።

፰ ዘሠርዐ ለአብርሃም፤ ወመሐለ ለይስሐቅ።

፱ ወአቀመ ስምዐ ለያዕቆብ፤ ወለእስራኤል ኪዳኖ ዘለዓለም።

፲ ወይቤሎ፤ ለከ እሁበከ ምድረ ከናዐን፤ ትኩንክሙ ሐብለ ርስትክሙ።

፲፩ እንዘ ውኁዳን ጥቀ እሙንቱ፤ ወፈላስያን ውስቴታ።

፲፪ ወኀለፉ እምሕዝብ ውስተ ሕዝብ፤ ወእምነገሥት ውስተ ካልእ ሕዝብ።

፲፫ ወኢኀደገ ይስሐጦሙ ሰብእ፤ ወገሠጸ ነገሥተ በእንቲአሆሙ።

፲፬ ኢትግስሱ መሲሓንየ፤ ወኢታሕሥሙ ዲበ ነቢያትየ።

፲፭ ወአምጽአ ረኃበ ለብሔር፤ ወአጥፍአ ኵሎ ኀይለ እክል።

፲፮ ፈነወ ብእሴ ቅድሜሆሙ፤ ወተሰይጠ ዮሴፍ ወኮነ ገብረ።

፲፯ ወሐማ እገሪሁ በመዋቅሕት፤ ወአምሰጠት ነፍሱ እምኀጺን። ዘእንበለ ይብጻሕ ቃሉ፤

፲፰ ቃለ እግዚአብሔር እመከሮ። ወፈነወ ንጉሥ ወፈትሖ፤ ወሤሞ መልአከ አሕዛብ።

፲፱ ወረሰዮ እግዚአ ለቤቱ፤ ወአኰነኖ ላዕለ ኵሉ ጥሪቱ።

፳ ከመ ይገሥጾሙ ለመላእክቲሁ ከማሁ፤ ወከመ ያጥብቦሙ ለሊቃውንቲሁ ከማሁ።

፳፩ ወቦአ እስራኤል ብሔረ ግብጽ፤ ወያዕቆብኒ ኀደረ ምድረ ካም።

፳፪ ወአብዝኆሙ ለሕዝቡ ፈድፋደ፤ ወአጽንዖሙ እምፀሮሙ።

፳፫ ወሜጠ ልቦሙ ከመ ይጽልኡ ሕዝቦ፤ ወከመ ይሐብልይዎሙ ለአግብርቲሁ።

፳፬ ወፈነወ ሙሴሃ ገብሮ፤ ወአሮንሃ ኅሩዮ።

፳፭ ወሤመ ቃለ ትእምርት ላዕሌሆሙ፤ ወመንክሮሂ በምድረ ካም።

፳፮ ወፈነወ ጽልመተ ወአጽለሞሙ፤ ወአምረርዎ ለቃሉ።

፳፯ ወረሰየ ማዮሙ ደመ፤ ወቀተለ ዐሣቲሆሙ።

፳፰ ወአውፅአት ምድሮሙ ቈርነነዓተ፤ ውስተ አብያተ ነገሥቶሙ።

፳፱ ይቤ ወመጽአ አኮት፤ ወትንንያ ውስተ ኵሉ ምድሮሙ።

፴ ወረሰየ ዝናሞሙ በረደ፤ ወነደ እሳት ውስተ ምድሮሙ።

፴፩ ወቀተለ ወይኖሙ ወበለሶሙ፤ ወቀጥቀጠ ኵሎ ዕፀወ ብሔሮሙ።

፴፪ ይቤ ወመጽአ አንበጣ፤ ወደጎብያ ዘአልቦ ኈልቈ።

፴፫ ወበልዐ ኵሎ ሣዕረ ብሔሮሙ፤ ወበልዐ ኵሎ ፍሬ ምድሮሙ።

፴፬ ወቀተለ ኵሎ በኵረ ብሔሮሙ፤ ወቀዳሜ ኵሉ ተግባሮሙ።

፴፭ ወአውፅኦሙ በወርቅ ወበብሩር፤ ወአልቦ ደዌ ውስተ ሕዝቦሙ።

፴፮ ወተፈሥሑ ግብጽ በፀአቶሙ፤ እስመ ፈርሀዎሙ።

፴፯ ወአንጦልዐ ደመና ወሰወሮሙ፤ ወእሳትኒ ከመ ያብርህ ሎሙ በሌሊት።

፴፰ ወሰአሉ ወመጽአ ፍርፍርት፤ ወአጽገቦሙ ኅብስተ ሰማይ።

፴፱ ወአንቅዐ ኰኵሐ ወአውሐዘ ማየ፤ ወሖሩ አፍላግ ውስተ በድው።

፵ እስመ ተዘከረ ቃሎ ቅዱሰ፤ ዘኀበ አብርሃም ገብሩ።

፵፩ ወአውፅኦሙ ለሕዝብ በትፍሥሕት፤ ወለኅሩያኒሁ በሐሤት።

፵፪ ወወሀቦሙ በሐውርተ አሕዛብ፤ ወወረሱ ጻማ ባዕድ።

፵፫ ከመ ይዕቀቡ ሕጎ፤ ወይኅሥሡ ሥርዐቶ።