መዝሙረ ዳዊት115

መዝሙረ ዳዊት ምዕራፍ ፻፲፭ ሀሌሉያ።

፩ አኮ ለነ እግዚኦ አኮ ለነ፤ ለስመ ዚአከ ሀብ ስብሐተ፤

፪ በምሕረትከ ወበጽድቅከ። ከመ ኢይበሉነ አሕዛብ፤ አይቴ ውእቱ አምላኮሙ።

፫ አምላክነሰ ውስተ ሰማይ ላዕለ፤ በሰማይኒ ወበምድርኒ ኵሎ ዘፈቀደ ገብረ እግዚአብሔር።

፬ አማልክቲሆሙ ለአሕዛብ ዘወርቅ ወብሩር፤ ግብረ እደ እጓለ እመሕያው።

፭ አፈ ቦሙ ወኢይነቡ፤ ዐይነ ቦሙ ወኢይሬእዩ።

፮ እዝነ ቦሙ ወኢይሰምዑ፤ አንፈ ቦሙ ወኢያጼንዉ።

፯ እደ ቦሙ ወኢይገሱ፤ እግረ ቦሙ ወኢየሐውሩ፤ ወኢይነቡ በጐራዒቶሙ። ወአልቦሙ መንፈሰ ውስተ አፉሆሙ።

፰ ከማሆሙ ለይኩኑ ኵሎሙ እለ ገብርዎሙ፤ ወኵሎሙ እለ ይትዌከሉ ቦሙ።

፱ ቤተ እስራኤል ተወከሉ በእግዚአብሔር፤ ረዳኢሆሙ ውእቱ ወምእመኖሙ።

፲ ቤተ አሮን ተወከሉ በእግዚአብሔር፤ ረዳኢሆሙ ውእቱ ወምእመኖሙ።

፲፩ እለ ትፈርህዎ ለእግዚአብሔር ተወከሉ በእግዚአብሔር፤ ረዳኢሆሙ ውእቱ ወምእመኖሙ።

፲፪ እግዚአብሔር ተዘከረነ ወባረከነ፤

፲፫ ባርክ ቤተ እስራኤል፤ ወባርክ ቤተ አሮን።

፲፬ ባርኮሙ ለኵሎሙ እለ ይፈርህዎ ለእግዚአብሔር፤ ለንኡሶሙ ወለዐቢዮሙ።

፲፭ ይዌስክ እግዚአብሔር ላዕሌክሙ፤ ላዕሌክሙ ወላዕለ ውሉድክሙ።

፲፮ ብሩካን አንትሙ ለእግዚአብሔር፤ ዘገብረ ሰማየ ወምድረ።

፲፯ ሰማየ ሰማያት ለእግዚአብሔር፤ ወምድረሰ ወሀበ ለእጓለ እመሕያው።

፲፰ ዘአኮ ምዉታን ይሴብሑከ እግዚኦ፤ ወኢኵሎሙ እለ ይወርዱ ውስተ ሲኦል።

፲፱ ንሕነ ሐያዋን ንባርኮ ለእግዚአብሔር፤ እምይእዜ ወእስከ ለዓለም።