መዝሙረ ዳዊት116
መዝሙረ ዳዊት ምዕራፍ ፻፲፮ ሀሌሉያ።
፩ አፍቀርኩ እስመ ሰምዐኒ እግዚአብሔር ቃለ ስእለትየ።
፪ ወአፅምአ እዝኖ ኀቤየ፤ ወጸዋዕክዎ በመዋዕልየ።
፫ አኀዘኒ ጻዕረ ሞት ወረከበኒ ሕማመ ሲኦል፤
፬ ሕማም ወምንዳቤ ረከበኒ። ወጸዋዕኩ ስመ እግዚአብሔር፤
፭ እግዚኦ ባልሓ ለነፍስየ። መሓሪ እግዚአብሔር ወጻድቅ፤ ወአምላክነሂ መስተሣህል።
፮ የዐቅብ ሕፃናተ እግዚአብሔር፤ ተመንደብኩሂ ወአድኀነኒ።
፯ ግብኢ ነፍስየ ውስተ ዕረፍትኪ፤ እስመ እግዚአብሔር ረዳኢኪ።
፰ እስመ አድኀና ለነፍስየ እሞት፤ ወለአዕይንትየኒ እምአንብዕ ወለእገርየኒ እምዳኅፅ።
፱ ከመ አሥምሮ ለእግዚአብሔር በብሔረ ሕያዋን።
፲ አመንኩ በዘነበብኩ፤ ወአንሰ ብዙኀ ሐመምኩ።
፲፩ አንሰ አቤ እምግዕዝየ፤ ኵሉ ሰብእ ሐሳዊ ውእቱ።
፲፪ ምንተኑ አዐስዮ ለእግዚአብሔር፤ በእንተ ኵሉ ዘገብረ ሊተ።
፲፫ ጽዋዐ ሕይወት እትሜጦ፤ ወስመ እግዚአብሔር እጼውዕ።
፲፬ ወእሁብ ብፅአትየ ለእግዚአብሔር፤ በቅድመ ኵሉ ሕዝብ።
፲፭ ክብር ሞቱ ለጻድቅ በቅድመ እግዚአብሔር።
፲፮ እግዚኦ አነ ገብርከ፤ ገብርከ ወልደ አመትከ፤
፲፯ ወሰበርከ መዋቅሕትየ። ለከ እሠውዕ መሥዋዕተ ስብሓት፤ ወስመ እግዚአብሔር እጼውዕ
፲፰ ወእሁብ ብፅአትየ ለእግዚአብሔር፤ በቅድመ ኵሉ ሕዝብ። በዐጸደ ቤተ እግዚአብሔር፤ ወበማእከሌኪ ኢየሩሳሌም።