መስተብቍዕ ዘሌሊት

መስተብቍዕ ዘሌሊት

ይ.ካ. ናስተበቊዕ ዘኵሎ ይእኅዝ እግዚአብሔር አብ ለእግዚእ ወመድኃኒነ ኢየሱስ ክርስቶስ እንዘ ነአኵቶ በኵሉ ወበውስተ ኵሉ እስመ ከደነነ ወረድአነ ሦቀነ ወብጽሐነ እስከ ዛቲ ሰዓት ንስእል ወናስተበቍዕ ከመ ተረፈ ሌሊትኒ በኵሉ ሰላም ወጥዒና ይረስየነ ዘለምሕረት ሥልጣን ቦቱ እግዚአብሔር አምላክነ

ይ.ዲ. ጸልዪ

ይ ካ እግዚኦ ዘኵሎ ትእኅዝ ንስእል ወናስተበቍዕ ቅዱስ ስመከ ነጽር ላዕሌነ ወውስተ ስእለትነ ሕጽር ሕዝበከ በኅይለ መላእክቲከ ኵሎ ሕመሜ ወኵሎ መንሡተ ደምስስ እላዕሌየ ወእምላዕለ ኵሉ ሕዝብከ ወተረፈ ሌሊትኒ በኵሉ ሰላም ወዳኅና ጸግወነ ነሀሉ በክርስቶስ ዘቦቱ ለከ ምስሌሁ ወምስለ ቅዱስ መንፈስ ስብሐት ወእኂዝ ይእዜኒ ወዘልፈኒ ወለዓለመ ዓለም