መልከአ ፍልሰታ በዜማ

ሰላም ለፍልሰተ ሥጋኪ ምስለ ነፍስኪ ኢመዋቲ በተሰናዕዎ አሐቲ:: ድንግል በ፪ኤ ማርያም ወለተ ማቲ ሐመረ ተርሴስ ዘሰሎሞን አንቲ እንተ አእተውዋ ጠቢባን ወርቀ አፌር (አፌዝ)ባቲ፡፡

ሰላም ለፍልሰተ ሥጋኪ መካነ ፍሥሓ ወኑዛዜ ኀበ ይረስእዎ ለላኅ ወኢይሔይልዎ ለትካዜ:: ማርያም ህሉት ውስተ ልበ አምላክ እምቅድመ ጊዜ ትፍሥሕትሰ ተእሣሕኩ በፍልሰትኪ ይእዜ ገጸ ዚአኪ እሬኢ ማዕዜ፡፡

ሰላም ለፍልሰተ ሥጋኪ እግዚአብሔር ዘባረካ ወዓልአለ ክብራ እምፍልሰተ ኄኖክ ወልደ ባረካ:: ማርያም ፍሥሕት ወብርህት ዕለተ ዋካ በእንቲአኪ ይገብሩ ውስተ ሰማያዊት ታዕካ ነገደ መላእክት አእላፍ ሱባዔ ፋሲካ፡፡

ሰላም ለፍልሰተ ሥጋኪ ዘኢይቀበል ሞገሱ ወዘኢይነጽፍ ባሕረ ተውዳሱ:: ማርያም ታዕካ ለእግዚአብሔር ጽርሓ መቅደሱ ተበሃሉ በሰማያት እለ ኪያኪ አፍለሱ ማርያምሰ እንተ በምድር ታንሶሱ፡፡

ሰላም ለፍልሰተ ሥጋኪ ውስተ ልበ ስብእ ዘኢተሐለየ እንዘ ትትዓጸፊ ጸጋ ወትለብሲ ዕበየ:: ማርያም ሥጋኪ ዘተመሰለ ባሕርየ ተሀውከ ሞት አኮኑ ሶበ ነጸረ ወርእየ እንዘ በደመና ብሩህ የአርግ ሰማየ፡፡

ሰላም ለፍልሰተ ሥጋኪ ዘአፈድፈደ ስባሔ እምፍልሰተ ያዕቆብ ዓርከ ኤሎሄ:: ማርያም ቀንሞስ ማርያም አፈወ ርኄ እንዘ ብርሃነ ይለብሱ ወይትአጸፉ ሡራኄ ሞገሰ ፍልሰትኪ መላእክት ሰበኩ ኵለሄ፡፡

ሰላም ለፍልሰተ ሥጋኪ ለሊቀ ካህናት ዘአደሞ መሥዋዕተ መድኃኒት ያዕርግ ቅድስተ ቅዱሳን ቀዊሞ:: ለመላከ ሞት ጸዋግ መልአከ በቀል ወተቀይሞ ሚመጠነ አድወዮ ወሚመጠነ አሕመሞ ሞገሰ ፍልሰትኪ ማርያም ዘአምላክ ሐተሞ፡፡

ሰላም ለፍልሰተ ሥጋኪ እምዓለመ መትሕት ኃላፊ ዉስተ አውደ ኪሩብ ተሃሉ እንዘ የዓቅባ ሱራፊ:: ማርያም ምዕዝት እምስነ ጽጌያት ዘወርኃ ተውፊ ናሁ ተሰጠምኩ ውስተ ባሕረ ስሕተት ጸናፊ በሐመረ ንጽሕኪ ወትረ ኪያየ ሐድፊ፡፡

ሰላም ለፍልሰተ ሥጋኪ ስቡሐ ዘተሰብሐ እንበሌኪ ድንግል ወእንበለ ወልድኪ በኵረ ፍሥሓ:: እምፀዳለ ፀሐይ ወወርኅ ስነ ስብሐቲሁ አብርሀ አልቦ ለሞት ማዕሠሪሁ ዘፈትሐ ወሙታነ በሲኦል አንቅሐ፡፡

ሰላም ለፍልሰተ ሥጋኪ ዘአጥናን ኃይሉ ወአኤናዎን መዝራዕተ ሣህሉ:: ማርያም ሣህልኪ ለትውልደ ትውልድ ዘይሄሉ አምጻኢተ ምሕረት ማርያም ለኃጥአነ ምድር ኵሉ ወቡርክት ማርያም ለክርስቶስ አባሉ፡፡

ሰላም ለፍልሰተ ሥጋኪ በሰዋሰወ ብርሃን ምጡቅ ከመ ትኲንዮሙ እመ ለኅሩያን ደቂቅ:: ተሣየጥኒ ድንግል በንዋየ ሣህልኪ ጽድቅ ከመ ይሠየጡ በዕለተ ፍትወት ወጻሕቅ ዘመደ አዕዋፍ ሐምስ በ፪ኤ ጸሪቅ፡፡

ሰላም ለፍልሰተ ሥጋኪ እግዚአብሔር ዘተዋሐዳ ወተካፈለ ክበዳ:: ለፍልሰትኪ ድንግል እምኢየሩሳሌም ምድረ ይሁዳ አፈወ ስኂን ወተዝካረ ዕጣን ፀዓዳ ነገሥተ ተርሴስ ወደስያት ያበውዑ ጋዳ፡፡

ሰላም ለፍልሰተ ሥጋኪ እግዚአብሔር ዘዓልዓሎ እምፍልሰተ ኤልያስ ነቢየ ሴሎ፡፡ ማርያም ሰድኒ ውስተ ብሔረ ትፍሥሕት በክነፈ አውሎ ለምንት ሊተ በነዝሕላል ውስተ ብሔረ ስሕተት እዴሎ እንዘ ይዴግነኒ ሞት ዘይእኅዝ ኲሎ፡፡

ሰላም ለፍልሰተ ሥጋኪ ውስተ ብሔር ሥዑር እንተ ኬንያሃ ወገባሪሃ እግዚአብሔር፡፡ ማርያም ኅብእኒ እምግብርናተ ሞት መሪር ሶበሰ ትፈቅዲ ንግሥተ ሰማያት ወምድር ኢይሰአነኪ አግዕዞቶ ለኃጥእ ገብር ፡፡

ሰላም ለፍልሰተ ሥጋኪ መካነ ፍሥሓ ምጡቀ በአዕባነ ባሕርይ ዘተነድቀ፡፡ ማርያም ደብተራ እንተ ኢትትከደኒ ሰቀ ጽሒፈ ውዳሴኪ እምኢኀልቀ ሶበ ኮነ ጥቀ ዝናመ ክረምት ቀለመ ወሰማይ ረቀ፡፡

ሰላም ለፍልሰተ ሥጋኪ ወለተ ንጉሥ የሁዳ ወወለተ ሌዊ እኁሁ ዘሀብተ ክህነቱ አገዳ፡፡ ማርያም ድንግል ምዕዝት ዘእምጽጌ ረዳ በጽሒፍ እይፌጽሞ ለስብሐትኪ እንግዳ እመ ኮነ በቅድሜየ ስፍሐ ምድር ሰሌዳ፡፡

ሰላም ለፍልሰተ ሥጋኪ ደባትረ ብርሃን ኀበ ተተክሉ ለገነተ ጽባሕ በማዕከሉ፡፡ ውድስት አንቲ ወስብሐት በአፈ ኲሉ እምነ ጻድቃን ዘታሕቱ ወእምትጉሃን ዘላዕሉ ማርያም ለኪ ስብሐተ አደሉ፡፡

ሰላም ለትንሣኤ ሥጋኪ ዘትንሣኤ ክርስቶስ መንታ ርእሶ ሕያወ ድኅረ ኀብአ ውስቴታ በጽላሎትኪ ኅብእኒ ማርያም ርግበ ኤፍራታ ወሰውርኒ በአጽፍኪ አመ ይከውን ሐተታ ወአመ ታገብእ ምድር ዘነሥአት ማኃፀንታ፡፡

ሰላም ለዕርገተ ሥጋኪ ዘተወጥነ ቦቱ ዕርገተ ቅዱሳን ሰብእ ዘበኀቤኪ ተአኲቱ፡፡ ለሊቃ ካህናት አሮን ማርያም ሠርጐ ትርሢቱ ሠዑለ ይኩን በልብስኪ እንተ ላዕሉ ወታሕቱ ፍሬ ከናፍር ወአፍ ውዳሴኪ ዝንቱ፡፡

ሰላም ለጊዮርጊስ ተውላጠ ፃማሁ ወሕማሙ እንተ ተለዓለ ሞገሰ ስሙ፡፡ በፍልሰትኪ ድንግል(ዮም) ተቶስሐ ፍልሰተ ዓጽሙ እንዘ ይብል ሶበ ጸለየ አሜሃ ቀዲሙ ምስለ ፍልሰትኪ ደምርኒ እሙ፡፡

ስብሐት ለኪ ማርያም ለአብ መርዓቱ፡፡ስብሐት ለኪ ማርያም ለወልድ ወላዲቱ፡፡ስብሐት ለኪ ማርያም ለመንፈስ ቅዱስ ታቦቱ፡፡ወርቅሰ ወብሩር ኃላፊ ውእቱ እምወርቅ ወእብሩር ኪያኪ እፈቱ፡፡