መዝሙር 4

መዝሙራት ዘዳዊት ምዕራፍ ፬ ፍጻሜ ዘአኩቴት፤ መዝሙር ዘዳዊት።

፩ ሶበ ጸዋዕክዎ ለእግዚአብሔር ሰምዐኒ ጽድቅየ ወእምንዳቤየ አርሐበ ሊተ።

፪ ተሥሀለኒ ወስምዐኒ ጸሎትየ።

፫ ደቂቀ እጓለ እመሕያው እስከ ማእዜኑ ታከብዱ ልብክሙ ለምንት ታፈቅሩ ከንቶ ወተኀሡ ሐሰተ።

፬ ኣእምሩ ከመ ተሰብሐ እግዚአብሔር በጻድቁ፤ እግዚአብሔር ይሰምዐኒ ሶበ ጸራኅኩ ኀቤሁ።

፭ ተምዑ ወኢተአብሱ፤ ወዘትሔልዩ በልብክሙ ውስተ መስካቢክሙ ይትዐወቀክሙ።

፮ ሡዑ መሥዋዕተ ጽድቅ ወተወከሉ ለእግዚአብሔር።

፯ ብዙኃን እለ ይቤሉ መኑ ያርእየነ ሠናይቶ፤ ተዐውቀ በላዕሌነ ብርሃነ ገጽከ እግዚኦ።

፰ ወወደይከ ትፍሥሕተ ውስተ ልብነ፤ እምፍሬ ስርናይ ወወይን ወቅብእ በዝኃ።

፱ በሰላም ቦቱ እሰክብ ወእነውም።

፲ እስመ እንተ እግዚኦ በተስፋ ባሕቲትከ ኣኅደርከኒ።