መዝሙር 5

መዝሙራት ዘዳዊት ምዕራፍ ፭ ፍጻሜ በእንተ ተወርሶ፤ መዝሙር ዘዳዊት።

፩ ቃልየ አፅምእ እግዚኦ ወለቡ ጽራኅየ።

፪ ወአፅምአኒ ቃለ ስእለትየ፤ ንጉሥየኒ ወአምላክየኒ።

፫ እስመ ኀቤከ እጼሊ። እግዚኦ በጽባሕ ስምዐኒ ቃልየ።

፬ በጽባሕእቀውም ቅድሜከ ወኣስተርኢ ለከ።

፭ እስመ ኢኮንከ አምላከ ዘዐመፃ ያፈቅር ወኢየኀድሩ እኩያን ምስሌከ።

፮ ወኢይነብሩ ዐማፅያን ቅድመ አዕይንቲከ ጸላእከ እግዚኦ ኵሎሙ ገበርተ ዐመፃ፤ ወትገድፎሙ ለኵሎሙ እለ ይነቡ ሐሰተ።

፯ ብእሴ ደም ወጕሕላዌ ይስቆርር እግዚአብሔር።

፰ ወአንሰ በብዝኀ ምሕረትከ እበውእ ቤተከ፤ ወእሰግድ ውስተ ጽርሐ መቅደስከ በፍሪሆትከ።

፱ እግዚኦ ምርሐኒ በጽድቅከ፤ ወበእንተ ጸላእትየ አርትዕ ፍኖትየ ቅድሜከ።

፲ እስመ አልቦ ጽድቀ ውስተ አፉሆሙ፤ ወልቦሙኒ ከንቱ።

፲፩ ከመ መቃብር ክሡት ጐራዒቶሙ፤ ወጸልሕዉ በልሳናቲሆሙ።

፲፪ ኰንኖሙ እግዚኦ ወይደቁ በውዴቶሙ፤ ወበከመ ብዝኀ ሕብሎሙ ስድዶሙ፤ እስመ አምረሩከ እግዚኦ።

፲፫ ወይትፌሥሑ ብከ ኵሎሙ እለ ይትዌከሉከ ለዓለም ይትሐሠዩ ወተኀድር ላዕሌሆሙ። ወይትሜክሑ ብከ ኵሎሙ እለ ያፈቅሩ ስመከ።

፲፬ እስመ አንተ ትባርኮ ለጻድቅ፤ እግዚኦ ከመ ወልታ ሥሙር ከለልከነ።