መዝሙር 22

መዝሙራት ዘዳዊት ምዕራፍ ፳፪ ፍጻሜ በእንተ ተወክፎ እንተ ጸብሐት፤ መዝሙር ዘዳዊት።

፩ አምላኪየ አምላኪየ ነጽረኒ ወለምንት ኀደገኒ፤ ርሑቅ እምአድኅኖትየ ቃለ ኃጢአትየ።

፪ አምላኪየ ጸራኅኩ ኀቤከ ዕለትየ ወኢሰማዕከኒ፤ ወሌሊትየኒ ቅድሜከ ወኢሐለይከኒ።

፫ ወአንተሰ ውስተ ቅዱሳኒከ ተኀድር ስቡሐ እስራኤል።

፬ ኪያከ ተወከሉ አበዊነ፤ ተወከሉከኒ ወአድኀንኮሙ።

፭ ኀቤከ ጸርኁ ወድኅኑ፤ ኪያከ ተወከሉ ወኢተኀፍሩ።

፮ አንሰ ዕፄ ወአኮ ሰብእ፤ ምኑን በኀበ ሰብእ ወትሑት በውስተ ሕዝብ።

፯ ኵሎሙ እለ ይሬእዩኒ ይትቃጸቡኒ፤ ይብሉ በከናፍሪሆሙ ወየሐውሱ ርእሶሙ።

፰ ተወከለ በእግዚአብሔር ለያድኅኖ፤ ወያድኅኖ እመ ይፈቅዶ።

፱ እስመ እንተ አውፃእከኒ እምከርሥ፤ ወተወከልኩከ እንዘ ሀለውኩ ውስተ አጥባተ እምየ። ላዕሌከ ተገደፍኩ እማኅፀን፤

፲ እምከርሠ እምየ አንተ አምላኪየ።

፲፩ ኢትርሐቅ እምኔየ እስመ አልጸቁ እትመንድብ፤ እስመ አልቦ ዘይረድአኒ።

፲፪ ዐገቱኒ አልህምት ብዙኃን፤ ወአኀዙኒ አስዋር ሥቡሓን፤

፲፫ ወአብቀዉ አፉሆሙ ላዕሌየ፤ ከመ አንበሳ ዘጽኑሕ ለመሲጥ።

፲፬ ተከዐውኩ ከመ ማይ ወተዘርወ ኵሉ አዕጽምትየ።

፲፭ ወኮነ ልብየ ከመ ሰምዕ ዘይትመሰው በማእከለ ከርሥየ።

፲፮ ወየብሰ ከመ ገልዕ ኀይልየ ወጠግዕ ልሳንየ በጕርዔየ፤ ወአውረድከኒ ውስተ መሬተ ሞት።

፲፯ ዐገቱኒ ከለባት ብዙኃን፤ ወአኀዙኒ ማኅበሮሙ ለእኩያን። ቀነዉኒ እደውየ ወእገርየ።

፲፰ ወኈለቁ ኵሎ አዕጽምትየ። እሙንተሰ ጠይቆሙ ተዐወሩኒ።

፲፱ ወተካፈሉ አልባስየ ለርእሶሙ፤ ወተዓፀዉ ዲበ ዐራዝየ።

፳ አንተ እግዚኦ ኢትርሐቅ እምኔየ፤ ወነጽር ውስተ ረዱኦትየ።

፳፩ አድኅና አምኲናት ለነፍስየ። ወእምእደ ከለባት ለብሕቱትየ።

፳፪ አድኅነኒ እምአፈ አንበሳ፤ ወእምአቅርንት ዘአሐዱ ቀርኑ ለብሕቱትየ።

፳፫ እነግሮሙ ስምከ ለአኀውየ፤ ወበማእከለ ማኅበር እሴብሐከ።

፳፬ እለ ትፈርህዎ ልእግዚአብሔር ሰብሕዎ፤ ኵልክሙ ዘርዐ ያዕቆብ አክብርዎ፤

፳፭ ወፍርህዎ ኵልክሙ ዘርዕ እስራኤል። እስመ ኢመነነ ወኢተቈጥዐ ስእለተ ነዳይ፤

፳፮ ወኢሜጠ ገጾ እምኔየ፤ ሶበ ጸራኅኩ ኀቤሁ ይሰምዐኒ።

፳፯ እምኀቤከ ክብርየ በማኅበር ዐቢይ፤ ወእሁብ ብፅአትየ በቅድመ እለ ይፈርህዎ።

፳፰ ይብልዑ ነዳያን ወይጽገቡ ወይሴብሕዎ ለእግዚአብሔር ኵሎሙ እለ የኀሥዎ፤ ወየሐዩ ልቦሙ ለዓለመ ዓለም።

፳፱ ወይዝክሩ ወይትመየጡ ኀበ እግዚአብሔር ኵሎሙ አጽናፈ ምድር፤

፴ ወይስግዱ ቅድሜሁ ኵሎሙ በሐውርተ አሕዛብ።

፴፩ እስመ ለእግዚአብሔር መንግሥት፤ ወውእቱ ይኴንኖሙ ለአሕዛብ።

፴፪ ብልዑ ወስግዱ ኵልክሙ ጥሉላነ ምድር ቅድሜሁ ይወድቁ ኵሎሙ እለ ይወርዱ ውስተ ምድር፤

፴፫ ወነፍስየኒ ሎቱ ተሐዩ። ወዘርዕየኒ ሎቱ ይትቀነይ፤

፴፬ ትዜንዎ ለእግዚአብሔር ትውልድ እንተ ትመጽእ። ወይዜንዉ ጽድቀ ዚአሁ፤ ሕዝብ ዘይትወለድ ዘገብረ እግዚአብሔር።