መዝሙር 24

መዝሙራት ዘዳዊት ምዕራፍ ፳፬ መዝሙር ዘዳዊት ዘቀዳሚተ ሰንበት።

፩ ለእግዚአብሔር ምድር በምልኣ፤ ወዓለምኒ ወኵሎሙ እለ ይነብሩ ውስቴታ።

፪ ወውእቱ በባሕር ሳረራ፤ ወበአፍላግኒ ውእቱ አጽንዓ።

፫ መኑ የዐርግ ውስተ ደብረ እግዚአብሔር፤ ወመኑ ይቀውም ውስተ መካነ መቅደሱ።

፬ ዘንጹሕ ልቡ ወንጹሕ እደዊሁ። ወዘኢነሥአ ከንቶ ላዕለ ነፍሱ፤ ወዘኢመሐለ በጕሕሉት ለቢጹ።

፭ ውእቱ ይነሥእ በረከተ እምኀበ እግዚአብሔር፤ ወሣህሉኒ እምኀበ እግዚአብሔር አምላኩ።

፮ ዛቲ ትውልድ ተኀሦ ሎቱ፤ ወተኀሥሥ ገጾ ለአምላከ ያዕቆብ።

፯ አርኅው ኆኃተ መኳንንት ወይትረኀዋ ኆኃት እለ እምፍጥረት፤ ወይባእ ንጉሠ ስብሐት።

፰ መኑ ውእቱ ዝንቱ ንጉሠ ስብሐት። እግዚአብሔር ኀያል ወጽኑዕ፤ እግዚአብሔር ኀያል በውስተ ፀብእ።

፱ አርኅው ኆኃተ መኳንንት ወይትረኀዋ ኆኃት እለ እምፍጥረት፤ ወይባእ ንጉሠ ስብሐት።

፲ መኑ ውእቱ ዝንቱ ንጉሠ ስብሐት፤ እግዚአብሔር አምላከ ኀያላን ውእቱ ዝንቱ ንጉሠ ስብሐት።