መዝሙር 27
መዝሙራት ዘዳዊት ምዕራፍ ፳፯ መዝሙር ዘዳዊት ዘእንበለ ይትቀባእ።
፩ እግዚአብሔር ያበርህ ሊተ ወያድኅነኒ ምንትኑ ያፈርሀኒ፤
፪ እግዚአብሔር ምእመና ለሕይወትየ ምንትኑ ያደነግፀኒ።
፫ ሶበ ይቀርቡኒ እኩያን ይብልዑኒ ሥጋየ፤
፬ ጸላእትየሰ እለ ይሣቅዩኒ እሙንቱ ደክሙ ወወድቁ።
፭ እመኒ ፀብአኒ ተዓይን ኢይፈርሀኒ ልብየ፤
፮ ወእመኒ ሮዱኒ ፀባኢት አንሰ ቦቱ ተወከልኩ።
፯ አሐተ ሰአልክዎ ለእግዚአብሔር ወኪያሃ አኀሥሥ፤ ከመ እኅድር ቤቶ ለእግዚአብሔር በኵሉ መዋዕለ ሕይወትየ፤
፰ ከመ ያርእየኒ ዘያሠምሮ ለእግዚአብሔር ወከመ እፀመድ ውስተ ቤተ መቅደሱ።
፱ እስመ ኀብአኒ ውስተ ጽላሎቱ በዕለተ ምንዳቤየ። ወሰወረኒ በምኅባአ ጽላሎቱ፤
፲ ወዲበ ኰኵሕ አልዐለኒ። ናሁ ይእዜ አልዐለ እግዚአብሔር ርእስየ ዲበ ጸላእትየ።
፲፩ ዖድኩ ወሦዕኩ ውስተ ደብተራሁ መሥዋዕተ፤ ወየበብኩ ሎቱ። እሴብሕ ወእዜምር ለእግዚአብሔር።
፲፪ ስምዐኒ እግዚኦ ቃልየ ዘሰአልኩ ኀቤከ። ተሣሀለኒ ወስምዐኒ
፲፫ ለከ ይብለከ ልብየ ወኀሠሥኩ ገጸከ፤ ገጸ ዚአከ አኀሥሥ እግዚኦ።
፲፬ ወኢትሚጥ ገጸከ እምኔየ ወኢትትገሐስ እምገብርከ ተምዒዐከ።
፲፭ ረዳኤ ኩነኒ ወኢትግድፈኒ ወኢትትሀየየኒ አምላኪየ ወመድኀኒየ።
፲፮ እስመ አቡየ ወእምየ ገደፉኒ፤ ወእግዚአብሔር ተወክፈኒ።
፲፯ ምህረኒ እግዚኦ ፍኖትከ፤ ወምርሐኒ ፍኖተ ርትዕከ በእንተ ጸላእትየ።
፲፰ ወኢትመጥወኒ ለነፍስ ለእለ ይሣቅዩኒ፤ እስመ ቆሙ ላእሌየ ሰምዕተ ዐመፃ ወሐሰወት ርእሳ ዐመፃ።
፲፱ እትአመን ከመ እርአይ ሠናይቶ ለእግዚአብሔር በብሔረ ሕያዋን።
፳ ወተሰፈዎ ለእግዚአብሔር። ተዐገሥ ወአጽንዕ ልበከ ወተሰፈዎ ለእግዚአብሔር።