መዝሙር 33

መዝሙራት ዘዳዊት ምዕራፍ ፴፫ መዝሙር ዘዳዊት።

፩ ተፈሥሑ ጻድቃን በእግዚአብሔር፤ ወለራትዓን ይደልዎሙ ክብር።

፪ ግነዩ ለእግዚአብሔር በመሰንቆ፤ ወበመዝሙር ዘዐሠርቱ አውታሪሁ ዘምሩ ሎቱ።

፫ ወሰብሐዎ ስብሐተ ሐዲሰ፤ ሠናየ ዘምሩ ወየብቡ ሎቱ።

፬ እስመ ጽድቅ ቃሉ ለእግዚአብሔር፤ ውኵሉ ግብሩ በሀይማኖት።

፭ ያፈቅር እግዚአብሔር ጽድቀ ወምጽዋተ፤ ሣህሉ ለእግዚአብሔር መልአ ምድረ።

፮ ወበቃለ እግዚአብሔር ጸንዓ ሰማያት፤ ወበእስትንፋሰ አፉሁ ኵሉ ኀይሎሙ።

፯ ዘያስተጋብኦ ከመ ዝቅ ለማየ ባሕር፤ ወይሠይሞሙ ውስተ መዛግብተ ቀላያት።

፰ ትፍርሆ ለእግዚአብሔር ኵላ ምድር፤ ወእምኔሁ ይደንግፁ ኵሎሙ እለ ይነብሩ ውስተ ዓለም።

፱ እስመ ውእቱ ይቤ ወኮኑ፤ ወውእቱ አዘዘ ወተፈጥሩ።

፲ እግዚአብሔር ይመይጥ ምክሮሙ ለአሕዛብ፤ ወይመይጥ ሕሊናሆሙ ለሕዝብ፤ ወያረስዖሙ ምክሮሙ ለመላእክት።

፲፩ ወምክሩሰ ለእግዚአብሔር ይሄሉ ለዓለም፤ ወሕሊና ልቡኒ ለትውልደ ትውልድ።

፲፪ ብፁዕ ሕዝብ ዘእግዚአብሔር አምላኩ፤ ሕዝብ ዘኀረየ ሎቱ ለርስቱ።

፲፫ እምሰማይ ሐወጸ እግዚአብሔር፤ ወርእየ ኵሎ ደቂቀ እጓለ እምሕያው።

፲፬ ወእምድልው ጽርሐ መቅደሱ፤ ወርእየ ላዕለ ኵሎሙ እለ ኅዱራን ዲበ ምድር።

፲፭ ዘውእቱ ባሕቲቱ ፈጠረ ልኮሙ፤ ዘያአምር ኵሎ ምግባሮሙ።

፲፮ ኢይድኅን ንጉሥ በብዝኀ ሰራዊቱ፤ ወያርብኅኒ ኢደኅነ በብዙኀ ኀይሉ።

፲፯ ወፈረስኒ ሐሳዊ ኢያድኅን፤ ወኢያመስጥ በብዝኀ ጽንዑ።

፲፰ ናሁ አዕይንቲሁ ለእግዚአብሔር ኀበ እለ ይፈርህዎ፤ ወእለሰ ይትዌከሉ በምሕረቱ።

፲፱ ያድኅና እሞት ለነፍሶሙ፤ ወይሴስዮሙ አመ ረኃብ።

፳ ነፍስነሰ ትሴፈዎ ለእግዚአብሔር፤ እስመ ረዳኢነ ወምስካይነ ውእቱ።

፳፩ እስመ ቦቱ ይትፌሣሕ ልብነ፤ ወተወከልነ በስሙ ቅዱስ።

፳፪ ለትኩን እግዚኦ ምሕረትከ ላዕሌነ፤ በከመ ላዕሌከ ተወከልነ።