መዝሙር 34
መዝሙራት ዘዳዊት ምዕራፍ ፴፬ መዝሙር ዘዳዊት፤ ዘአመ በዐደ ገጾ እምቅድሜሁ ለአቢሜሌክ።
፩ እባርኮ ለእግዚአብሔር በኵሉ ጊዜ፤ ወዘልፈ ስብሓቲሁ ውስተ አፉየ።
፪ በእግዚአብሔር ትከብር ነፍስየ፤
፫ ይስምዑ የዋሃን ወይትፈሥሑ።
፬ አዕብይዎ ለእግዚአብሔር ምስሌየ፤ ወናልዕል ስሞ ኅቡረ።
፭ ኀሠሥክዎ ለእግዚአብሔር ወተሠጥወኒ፤ ወእምኵሉ ምንዳቤየ አድኀነኒ።
፮ ቅረቡ ኀቤሁ ወያበርህ ለክሙ፤ ወኢይትኀፈር ገጽክሙ።
፯ ዝንቱ ነዳይ ጸርኀ ወእግዚአብሔር ሰምዖ፤ ወእምኵሉ ምንዳቤሁ አድኀኖ።
፰ ይትዐየን መልአከ እግዚአብሔር ዐውዶሙ ለእለ ይፈርህዎ ወያድኅኖሙ።
፱ ጠዐሙ ወታእምሩ ከመ ኄር እግዚአብሔር፤ ብፁዕ ብእሲ ዘተወከለ ቦቱ።
፲ ፍርህዎ ለእግዚአብሔር ኵልክሙ ቅዱሳኑ፤ እስመ አልቦሙ ተፅናሰ ለእለ ይፈርህዎ።
፲፩ ብዑላንሰ ነድዩ ወርኅቡ፤ ወእለሰ ይኀሥዎ ለእግዚአብሔር ኢተጸነሱ እምኵሎ ሠናይ።
፲፪ ንዑ ደቂቅየ ወስምዑኒ፤ ፈሪሀ እግዚአብሔር እምህርክሙ።
፲፫ መኑ ውእቱ ብእሲ ዘይፈቅዱ ሐይወ፤ ወያፍቅር ይርእይ መዋዕለ ሠናያተ።
፲፬ ክላእ ልሳነከ እምእኩይ፤ ወከናፍሪከኒ ከመ ኢይንብባ ጕሕሉተ።
፲፭ ተገሐሥ እምእኩይ ወግበር ሠናየ፤ ኅሥሣ ለሰላም ወዴግና።
፲፮ እስመ አዕይንቲሁ ለእግዚአብሔር ኀበ ጻድቃኑ፤ ወእዝኑሂ ኀበ ስእለቶሙ።
፲፯ ገጹ ለእግዚአብሔር ኀበ እለ ይገብሩ እኩየ፤ ከመ ይሠረው እምድር ዝክሮሙ።
፲፰ ጸርኁ ጻድቃን ወእግዚአብሔር ሰምዖሙ፤ ወእምኵሉ ምንዳቤሆሙ አድኀኖሙ።
፲፱ ቅሩብ እግዚአብሔር ለየዋሃነ ልብ፤ ወያድኅኖሙ ለትሑታነ መንፈስ።
፳ ብዙኅ ሕማሞሙ ለጻድቃን፤ ወእምኵሉ ያድኅኖሙ እግዚአብሔር።
፳፩ እግዚአብሔር የዐቅብ ኵሎ አዕጽምቲሆሙ፤ ወኢይትቀጠቀጥ አሐዱ እምውስቴቶሙ።
፳፪ ሞቱ ለኃጥእ ፀዋግ፤ ወእለሰ ይጸልእዎ ለጻድቅ ይኔስሑ።
፳፫ ይቤዙ እግዚአብሔር ነፍሰ አግብርቲሁ፤ ወኢይኔስሑ ኵሎሙ እለ ይትዌከሉ ቦቱ።