መዝሙር 44

መዝሙራት ዘዳዊት ምዕራፍ ፵፬ ፍጻሜ ዘደቂቀ ቆሬ ዘበኣእምሮ መዝሙር።

፩ እግዚኦ ሰማዕነ በእዘኒነ ወአበዊነሂ ዜነዉነ።

፪ ግብረ ዘገበርከ በመዋዕሊሆሙ በመዋዕለ ትካት።

፫ እዴከ ሠረወቶሙ ለፀር ወተከልከ ኪያሆሙ፤ ሣቀይኮሙ ለአሕዛብ ወሰደድኮሙ።

፬ ዘአኮ በኲናቶሙ ወረስዋ ለምድር ወመዝራዕቶሙ ኢያድኀኖሙ፤

፭ ዘእንበለ የማንከ ወመዝራዕትከ ወብርሃነ ገጽከ እስመ ተሣሀልኮሙ።

፮ አንተ ውእቱ ንጉሥየ ወአምላኪየ፤ ዘአዘዝከ መድኀኒቶ ለያዕቆብ።

፯ ብከ ንወግኦሙ ለኵሎሙ ፀርነ፤ ወበስምከ ናኀስሮሙ ለእለ ቆሙ ላዕሌነ።

፰ ዘአኮ በቀስትየ እትአመን፤ ወኲናትየኒ ኢይድኀነኒ።

፱ ወአድኀንከነ እምእለ ሮዱነ፤ ወአስተኀፈርኮሙ ለኵሎሙ ጸላእትነ።

፲ በእግዚአብሔር ንከብር ኵሎ አሚረ፤ ወለስምከ ንገኒ ለዓለም።

፲፩ ይእዜሰ ገደፍከነ ወአስተኀፈርከነ፤ ወኢትወፅእ አምላክነ ምስለ ኀይልነ

፲፪ ወአግባእከነ ድኅሬነ ኀበ ፀርነ፤ ወተማሰጡነ ጸላእትነ።

፲፫ ወወሀብከነ ይብልዑነ ከመ አባግዕ፤ ወዘረውከነ ውስተ አሕዛብ።

፲፬ መጦከ ሕዝበከ ዘእንበለ ሤጥ፤ ወአልቦ ብዝኀ ለይባቤነ።

፲፭ ረሰይከነ ጽእለተ ለጎርነ፤ ሠሓቀ ወሥላቀ ለአድያሚነ።

፲፮ ወረሰይከነ አምሳለ ለአሕዛብ፤ ወሑስተ ርእስ ለሕዝብ።

፲፯ ኵሎ አሚረ ቅድሜየ ውእቱ ኀፍረትየ፤ ወከደነኒ ኀፍረተ ገጽየ።

፲፰ እምቃለ ዘይጽእል ወይዘረኪ፤ እምገጸ ፀራዊ ዘይረውድ።

፲፱ ዝንቱ ኵሉ በጽሐ ላዕሌነ ወኢረሳዕናከ ወኢዐመፅነ ኪዳነከ።

፳ ወኢገብአ ድኀሬሁ ልብነ፤ ወኢተግሕሠ አሰርነ እምፍኖትከ።

፳፩ እስመ አሕመምከነ በብሔር እኩይ፤ ወደፈነነ ጽላሎተ ሞት።

፳፪ ሶበሁ ረሳዕነ ስሞ ለአምላክነ፤ ወሶበሁ አንሣእነ እደዊነ ኀበ አምላክ ነኪር።

፳፫ አኮኑ እግዚአብሔር እምተኃሠሦ ለዝንቱ፤ እስመ ውእቱ ያአምር ኀቡኣተ ልብ።

፳፬ እስመ በእንቲአከ ይቀትሉነ ኵሎ አሚረ ወኮነ ከመ አባግዕ ዘይጠብሑ።

፳፭ ንቃህ እግዚኦ ለምንት ትነውም ተንሥእ ወኢትግድፈነ ለዝሉፉ።

፳፮ ወለምንት ትመይጥ ገጸከ እምኔነ፤ ወትረስዐነ ሕማመነ ወተጽናሰነ።

፳፯ እስመ ኀስረት ውስተ ምድር ነፍስነ፤ ወጠግዐት በምድር ከርሥነ።

፳፰ ተንሥእ እግዚኦ ርድአነ፤ ወአድኅነነ በእንተ ስምከ።