መዝሙር 45
መዝሙራት ዘዳዊት ምዕራፍ ፵፭ ፍጻሜ በእንተ እለ ተበዐዱ ዘውሉደ ቆሬ፤ መዝሙር ዘዳዊት ዘበኣእምሮ።
፩ ጐሥዐ ልብየ ቃለ ሠናየ አነ ኣየድዕ ግብርየ ለንጉሥ፤
፪ ከመ ቀለመ ጸሓፊ ዘጠበጠበ ይጽሕፍ ልሳንየ።
፫ ይሤኒ ላሕዩ እምውሉደ እጓለ እመሕያው ተክዕወ ሞገስ እምከናፍሪከ፤ በእንተዝ ባረከከ እግዚአብሔር ለዓለም።
፬ ቅንት ሰይፈከ ኀይል ውስተ ሐቌከ፤
፭ በሥንከ ወበላሕይከ። አርትዕ ተሠራሕ ወንገሥ
፮ በእንተ ጽድቅ ወርትዕ ወየዋሃት፤ ወይመርሐከ ስብሐተ የማንከ።
፯ አሕጻከ ስሑል ኀያል አሕዛብ ይወድቁ ታሕቴከ፤ ውስተ ልቦሙ ለጸላእተ ንጉሥ።
፰ ወንበርከ እግዚኦ ለዓለመ ዓለም፤ በትረ ጽድቅ በትረ መንግሥትከ።
፱ አፍቀርከ ጽድቀ ወዐመፃ ጸላእከ በእንተዝ ቀብአከ እግዚአብሔር አምላክከ፤ ቅብአ ትፍሥሕት እምእለ ከማከ።
፲ ከርቤ ወቀንአተ ወሰሊኆት እምነ አልባሲከ፤ እምክቡዳነ አቅርንት ዘእምኔሆሙ አስተፈሥሓከ አዋልደ ነገሥት ለክብርከ፤
፲፩ ወትቀውም ንግሥት በየማንከ በአልባሰ ወርቅ ዑጽፍት ወሑብርት።
፲፪ ስምዒ ወለትየ ወርእዪ ወአፅምዒ እዝነኪ፤ ወርስዒ ሕዝበኪ ወቤተ አቡኪ።
፲፫ እስመ ፈተወ ንጉሥ ሥነኪ፤ እስመ ውእቱ እግዚእኪ።
፲፬ ወይሰግዳ ሎቱ አዋልደ ጠሮስ በአምኃ ወለገጽኪ ይትመሀለሉ ኵሎሙ አሕዛብ ብዑላነ ምድር።
፲፭ ኵሉ ክብራ ለወለተ ንጉሥ ሐሴቦን፤ በዘአዝፋረ ወርቅ ዑጽፍት ወሑብርት።
፲፮ ወይወስዱ ለንጉሥ ደናግለ ድኅሬሃ፤ ወቢጻሂ ይወስዱ ለከ።
፲፯ ወይወስድዎን በትፍሥሕት ወበሐሤት፤ ወያበውእዎን ውስተ ጽርሕ ንጉሥ።
፲፰ ህየንተ አበዊኪ ተወልዱ ለኪ ደቂቅ፤ ወትሠይምዮሙ መላእክተ ለኵሉ ምድር።
፲፱ ወይዘከሩ ስመኪ በኵሉ ትውልደ ትውልድ፤
፳ በእንተዝ ይገንዩ ለከ አሕዛብ እግዚኦ ለዓለም ወለዓለመ ዓለም።