መዝሙር 64

መዝሙራት ዘዳዊት ምዕራፍ ፷፬ ፍጻሜ መዝሙር ዘዳዊት።

፩ ስምዐኒ እግዚኦ ጸሎትየ ዘሰአልኩ ኀቤከ፤ እምትሕዝብተ ጽላኢ አድኅና ለነፍስይ።

፪ ወሰውረኒ እምዕሌቶሙ ለእኩያን፤ ወእምብዝኆሙ ለገበርተ ዐመፃ።

፫ እለ አብልኁ ልሳኖሙ ከመ አርዌ ምድር፤ ወወሰቁ ቀስቶሙ ለገቢረ መሪር። ከመ ይቅትልዎ ለንጹሕ በጽሚት፤

፬ ግብተ ይነድፍዎሙ ወኢይፈርሁ። ወአጽንዑ ሎሙ ነገረ እኩየ

፭ ወተማከሩ ይኅብኡ ሎሙ መሥገርተ፤ ወይቤሉ አልቦ ዘይሬእየነ።

፮ ወኀሠሥዋ ለዐመፃ ወኀልቁ እዝነ ይፈትኑ ወይወጥኑ፤

፯ ወይበውእ ሰብእ በልብ ዕሙቅ፤ ወይትሌዐል እግዚአብሔር።

፰ ከመ ሐጸ ደቂቅ ኮነ መቅሠፍቶሙ። ወደክመ ለሳኖሙ በላዕሌሆሙ

፱ ወደንገፁ ኵሎሙ እለ ርእይዎሙ። ወፈርሁ ኵሉ ሰብእ

፲ ወነገሩ ግብረ እግዚአብሔር፤ ወአእመሩ ምግባሮ።

፲፩ ይትፌሣሕ ጻድቅ በእግዚአብሔር ወይትዌከል ቦቱ፤ ወይከብሩ ኵሎሙ ርቱዓነ ልብ።