መዝሙር 73
መዝሙራት ዘዳዊት ምዕራፍ ፸፫ መዝሙር ዘአሳፍ።
፩ ጥቀ ኄር እግዚአብሔር ለእስራኤል ለርቱዓነ ልብ።
፪ ሊተሰ ሕቀ ክመ ዘእምተንተና እገርየ፤ ወሕቀ ክመ ዘእምድኅፀ ሰኰናየ።
፫ እስመ ቀናእኩ ላዕለ ኃጥኣን፤ ሰላሞሙ ርእይየ ለዐማፅያን።
፬ እስመ አልቦሙ ሣኅተ ለሞቶሙ፤ ወኢኀይለ ለመቅሠፍቶሙ።
፭ ወበጻማሂ ኢኮኑ ከመ ሰብእ፤ ወኢተቀሥፉ ምስለ ሰብእ።
፮ ወበእንተዝ አኀዞሙ ትዕቢት፤ ወተዐጸፍዋ ለኀጢአቶሙ ወለዐመፃሆሙ።
፯ ወይወፅእ ከመ እምአንጕዕ ኀጢአቶሙ፤ ወኀለፈ እምትዕቢተ ልቦሙ።
፰ ወሐለዩ ወነበቡ ከንቶ፤ ወነበቡ ዐመፃ ውስተ አርያም።
፱ ወአንበሩ ውስተ ሰማይ አፉሆሙ፤ ወአንሶሰው ውስተ ምድር ልሳኖሙ።
፲ ወበእንተዝ ይትመየጡ ሕዝብየ እምዝየ፤ ወይትረከብ ፍጹም መዋዕል በላዕሌሆሙ።
፲፩ ወይብሉ እፎ ያአምር እግዚአብሔር፤ ወቦኑ ዘያአምር በአርያም።
፲፪ ናሁ እሉ ኃጥኣን ይትፈግዑ ወለዓለም ያጸንዕዋ ለብዕሎሙ።
፲፫ ወእቤ ከንቶሁ እንጋ አጽደቅዋ ለልብየ፤ ወኀፀብኩ በንጹሕ እደውየ።
፲፬ ወኮንኩ ቅሡፈ ኵሎ አሚረ፤ ወዘለፋየኒ በጽባሕ።
፲፭ ሶበ እቤሁ ነበብኩ ከመዝ፤ ናሁ ሠራዕኩ ለትውልደ ደቂቅከ።
፲፮ ወተወከፍኩ ከመ ኣእምር፤ ወዝንቱሰ ጻማ ውእቱ በቅድሜየ።
፲፯ እስከ እበውእ ውስተ መቅደሱ ለእግዚአብሔር፤ ከመ ኣእምር ደኃሪቶሙ።
፲፰ ወባሕቱ በእንተ ጽልሑቶሙ አጽናሕኮሙ፤ ወነፃኅኮሙ በተንሥኦቶሙ።
፲፱ እፎ ኮኑ ለሙስና ግብተ ኀልቁ ወተሐጕሉ በእንተ ኀጢአቶሙ።
፳ ከመ ዘንቃህ እምንዋም እግዚኦ በሀገርከ አኅስር ራእዮሙ።
፳፩ እስመ ውዕየ ልብየ ወተመስወ ኵልያትየ። ወአንሰ ምኑን ወኢያእምርኩ፤
፳፪ ወኮንኩ ከመ እንስሳ በኀቤከ። ወአንሰ ዘልፈ ምስሌከ፤
፳፫ አኀዝከኒ እዴየ ዘየማን። ወበምክረ ዚአከ መራሕከኒ፤ ወምስለ ስብሐት ተወከፍከኒ፤
፳፬ ምንተ ብየ ተሀሉ ውስተ ሰማይ፤ ወምንተ እፈቅድ ኀቤከ ውስተ ምድር።
፳፭ ኀልቀ ልብየ ወሥጋየ በአምላከ መድኀኒትየ እግዚአብሔር መክፈልትየ ለዓለም።
፳፮ እስመ ናሁ እለ ይርሕቁ እምኔከ ይትሐጐሉ፤ ወሠረውኮሙ ለኵሎሙ እለ ይዜምዉ እምኔከ።
፳፯ ሊተሰ ተሊወ እግዚአብሔር ይኄይሰኒ፤ ወትውክልትየኒ ላዕለ እግዚአብሔር፤
፳፰ ከመ እንግር ኵሎ ስብሐቲሁ። በአናቅጺሃ ለወለተ ጽዮን።