መዝሙር 77
መዝሙራት ዘዳዊት ምዕራፍ ፸፯ ፍጻሜ በእንተ ኢዶቱም መዝሙር ዘአሳፍ።
፩ ቃልየ ኀበ እግዚአብሔር ጸራኅኩ፤ ቃልየ ኀበ እግዚአብሔር ወአፅምአኒ።
፪ በዕለተ ምንደቤየ ኀሠሥክዎ ለእግዚአብሔር፤ እደውየ ሌሊተ ቅድሜሁ ወኢኬዱኒ፤
፫ ቀብጸት ነፍስየ ትፍሥሕተ። ተዘከርክዎ ለእግዚአብሔር ወተፈሣሕኩ፤ ተዛዋዕኩሂ ወዐንበዘት ነፍስየ።
፬ ተራከብክዎን ለሰዓታተ ኵሎሙ ጸላእትየ፤ ደንገፅኩሂ ወኢነበብኩ።
፭ ወሐለይኩ መዋዕለ ትካት፤ ወተዘከርኩ ዐመተ ዓለም ወአንበብኩ።
፮ ሌሊተ ተዛዋዕኩ ምስለ ልብየ ወአንቃክህዋ ለነፍስየ።
፯ ቦኑ ለዓለም ይገድፍ እግዚአብሔር፤ ወኢይደግምኑ እንከ ተሣህሎ።
፰ ቦኑ ለግሙራ ይመትር ምሕረቶ ለትውልደ ትውልድ።
፱ ወይረስዕኑ እግዚአብሔር ተሣህሎ፤ ወይደፍንኑ ምሕረቶ በመዐቱ።
፲ ወእቤ እምይእዜ ወጠንኩ፤ ከመዝ ያስተባሪ የማኖ ልዑል።
፲፩ ወተዘከርኩ ግብሮ ለእግዚአብሔር፤ እስመ እዜከር ዘትካት ምሕረትከ።
፲፪ ወኣነብብ በኵሉ ምግባሪከ፤ ወእዛዋዕ በግብርከ።
፲፫ እግዚኦ ውስተ መቅደስ ፍኖትከ፤ መኑ አምላክ ዐቢይ ከመ አምላክነ። አንተ እግዚአብሔር ባሕቲትከ ዘትገብር መንክረ፤
፲፬ አርአይኮሙ ለሕዝብከ ኀያለከ። ወአድኀንኮሙ ለሕዝብከ በመዝራዕትከ፤ ለደቂቀ ያዕቆብ ወዮሴፍ።
፲፭ ርእዩከ ማያት እግዚኦ፤ ርእዩከ ማያት ወፈርሁ።
፲፮ ደንገፁ ቀላያት ማያት ወደምፁ ማያቲሆሙ። ቃለ ወሀቡ ደመናት ወአሕፃከ ያወፅኡ።
፲፯ ቃለ ነጐድጓድከ በሰረገላት፤
፲፰ አስተርአየ መባርቅቲሁ ለዓለም፤ ርዕደት ወአድለቅለቀት ምድር።
፲፱ ውስተ ባሕር ፍኖትከ ወአሰርከኒ ውስተ ማይ ብዙኅ፤ ወኢይትዐወቅ አሰርከ።
፳ ወመራሕኮሙ ከመ አባግዕ ለሕዝብከ፤ በእደ ሙሴ ወአሮን።