መዝሙር 86
መዝሙራት ዘዳዊት ምዕራፍ ፹፮ ጸሎት ዘዳዊት።
፩ አፅምእ እግዚኦ እዝነከ ኀቤየ ወስምዐኒ፤ እስመ ነዳይ ወምስኪን አነ።
፪ ዕቀባ ለነፍስየ እስመ የዋህ አን፤ አድኅኖ ለገብርከ አምላኪየ ዘተወከለ ኪያከ።
፫ ተሣሀለኒ እግዚኦ እስመ ኀቤከ እጸርኅ ኵሎ አሚረ። ወአስተፈሥሓ ለነፍሰ ገብርከ፤ እስመ ኀቤከ አንቃዕደውኩ ነፍስየ።
፬ እስመ መሓሪ አንተ እግዚኦ ወመስተሣህል፤ ወብዙኅ ሣህልከ ለኵሎሙ እለ ይጼውዑከ።
፭ አፅምእ እግዚኦ ጸሎትየ፤ ወነጽር ቃለ ስእለትየ።
፮ በዕለተ ምንዳቤየ ጸራኅኩ እስመ ሰማዕከኒ።
፯ አልቦ ዘይመስለከ እምነ አማልክት እግዚኦ፤ ወአልቦ ዘከመ ምግባሪከ።
፰ ኵሎሙ አሕዛብ እለ ገበርከ ይምጽኡ ወይስግዱ ቅድሜከ እግዚኦ፤ ወይሰብሑ ለስምከ።
፱ እስመ ዐቢይ አንተ እግዚኦ ወትገብር መንክረ፤ አንተ እግዚአብሔር ባሕቲትከ ዐቢይ።
፲ ምርሐኒ እግዚኦ ፍኖተከ ወእሖር በጽድቅከ፤ ይትፌሣሕኒ ልብየ ለፈሪሀ ስምከ።
፲፩ እገኒ ለከ እግዚኦ በኵሉ ልብየ አምላኪየ፤ ወእሴብሕ ለስምከ ለዓለም።
፲፪ እስመ ዐብየት ምሕረትከ ላዕሌየ፤ ወአድኀንካ ለነፍስየ እምሲኦል ታሕቲት።
፲፫ አምላኪየ ዐማፅያን ቆሙ ላዕሌየ ወማኅበረ እኩያን ኀሠሥዋ ለነፍስየ፤ ወኢረሰዩከ ቅድሜሆሙ።
፲፬ ወአንተሰ እግዚኦ መሓሪ ወመስተሣህል፤ ርሑቀ መዐት ወብዙኀ ምሕረት ወጻድቅ።
፲፭ ነጽር ላዕሌየ ወተሣሀለኒ፤ ሀቦ ኀይለ ለገብርከ ወአድኅኖ ለወልደ አመትከ።
፲፮ ግበር ምስሌነ ትእምርተ ለሠናይ፤ ወይርአዩ ጸላእትነ ወይትኀፈሩ ከመ አንተ እግዚኦ ረዳእከነ ወአስተፈሣሕከነ።