መዝሙር 132

መዝሙራት ዘዳዊት ምዕራፍ ፻፴፪ ማኅሌት ዘበመዓርጊሁ።

፩ ተዘከሮ እግዚኦ ለዳዊት፤ ወለኵሉ የዋሀቱ።

፪ ዘከመ መሐለ እግዚአብሔር፤ ወበፅአ ለአምላከ ያዕቆብ።

፫ ከመ ኢይበውእ ውስተ ጽላሎተ ቤትየ፤ ወከመ ኢያዐርግ ውስተ ዐራተ ምስካብየ።

፬ ከመ ኢይሁቦን ንዋመ ለአዕይንትየ፤ ወኢድቃሰ ለቀራንብትየ

፭ ወኢዕረፍተ ለመላትሕየ። እስከ እረክብ መካኖ ለእግዚአብሔር፤ ወማኅደሮ ለአምላከ ያዕቆብ።

፮ ናሁ ሰማዕናሁ በኤፍራታ፤ ወረከብናሁ ውስተ ዖመ ገዳም።

፯ ንበውእ እንከሰ ውስተ አብያቲሁ፤ ወንሰግድ ውስተ መካን ኀበ ቆመ እግረ እግዚእነ።

፰ ተንሥእ እግዚኦ ውስተ ዕረፍትከ፤ አንተ ወታቦተ መቅደስከ።

፱ ካህናቲከ ይለብሱ ጽድቀ፤ ወጻድቃኒከ ትፍሥሕተ ይትፍፈሥሑ።

፲ በእንተ ዳዊት ገብርከ፤ ወኢትሚጥ ገጸከ እመሲሕከ።

፲፩ መሐለ እግዚአብሔር ለዳዊት በጽድቅ ወኢይኔስሕ፤ እስመ እምፍሬ ከርሥከ ኣነብር ዲበ መንበርከ።

፲፪ ወለእመ ዐቀቡ ደቂቅከ ሕግየ ወሰምዑኒ ዘንተ ዘእሜህሮሙ፤

፲፫ ወደቂቆሙኒ እስከ ለዓለም፤ ይበንሩ ዲበ መንበርከ።

፲፬ እስመ ኀረያ እግዚአብሔር ለጽዮን፤ ወአብደራ ከመ ትኩኖ ማኅደሮ።

፲፭ ዛቲ ይእቲ ምዕራፍየ ለዓለም፤ ዝየ አኀደር እስመ ኀረይክዋ።

፲፮ ለእቤራቲሃኒ ባርኮ እባርኮን፤ ወለነዳያኒሃኒ ኣጸግቦሙ እክለ።

፲፯ ወለካህናቲሃኒ ኣለብሶሙ ሕይወተ፤ ወጻድቃኒሃኒ ትፍሥሕተ ይትፍፌሥሑ።

፲፰ ወበህየ ኣበቍል ቀርነ ለዳዊት፤ ወኣስተዳሉ ማኅቶተ ለመሲሕየ።

፲፱ ወኣለብሶሙ ኀፍረተ ለጸላእቱ፤ ወቦቱ ይፈሪ ቅድሳትየ።