መዝሙር 148

መዝሙራት ዘዳዊት ምዕራፍ ፻፵፰ ሀሌሉያ ዘሐጌ ወዘዘካርያስ።

፩ ሰብሕዎ ለእግዚአብሔር እምሰማያት፤ ይሴብሕዎ በአርያም።

፪ ይሴብሕዎ ኵሎሙ መላእክቲሁ፤ ይሴብሕዎ ኵሉ ኀይሉ።

፫ ይሴብሕዎ ፀሓይ ወወርኅ፤ ይሴብሕዎ ኵሉ ከዋክብት ወብርሃን።

፬ ይሴብሕዎ ሰማያተ ሰማያት፤ ወማይኒ ዘመልዕልተ ሰማያት። ይሴብሕዎ ለስመ እግዚአብሔር፤

፭ እስመ ውእቱ ይቤ ወኮኑ ወውእቱ አዘዘ ወተፈጥሩ።

፮ ወአቀሞሙ ለዓለም ወለዓለመ ዓለም፤ ትእዛዘ ወሀቦሙ ወኢኀለፉ።

፯ ሰብሕዎ ለእግዚአብሔር እምድር፤ አክይስትኒ ወኵሉ ቀላያት።

፰ እሳት ወበረድ አስሐትያ ወሐመዳ፤ መንፈሰ ዐውሎ ዘይገብር ነቢቦ።

፱ አድባርኒ ወኵሉ አውግር፤ ዕፀውኒ ዘይፈሪ ወኵሉ አርዝ።

፲ አራዊትኒ ወኵሉ እንስሳ፤ ዘይትሐወስኒ ወአዕዋፍ ዘይሠርር።

፲፩ ነገሥተ ምድርኒ ወኵሉ አሕዛብ፤ መላእክትኒ ወኵሉ መኳንንተ ምድር።

፲፪ ወራዙትኒ ወደናግል፤ ሊቃናትኒ ወመሐዛት። ይሰብሑ ለስመ እግዚአብሔር እስመ ተለዐለ ስሙ ለባሕቲቱ፤

፲፫ ይገንዩ ሎቱ በሰማይ ወበምድር። ወያሌዕል ቀርነ ሕዝቡ

፲፬ ወስብሐተ ኵሉ ጻድቃኑ፤ ለደቂቀ እስራኤል ሕዝብ ዘቅሩብ ሎቱ።