መሃረነ አብበሰዓታት ዜማ

መሐረነ አብ

ዘበእንቲአሃ ለቤተክርስቲያን ተጸፋእከ በውስተ ዐውድ ከመ ትቀድሳ በደምከ ክቡር ዘበእንቲአሃ ዝግሐታተ መዋቅሕት ፆረ ወተዐገሰ ምራቀ ርኩሰ እንዘ አልቦ ዘአበሰ አምላክ ዲበ ዕፀ መስቀል ተሰቅለ

መሀረነ አብ ሃሌ ሉያ ተሣሃለነ ወልድ ሃሌ ሉያ መንፈስቅዱስ መሐሪ ተዘከረነ በሣህልከ፡፡ ለከ ንፌኑ ስብሐተ ወለከ ናዓርግ አኰቴተ፡፡ መሐረነ መሐሪ ኃጢአተነ አስተሥሪ ወአድኃነነ ወተማኅፀን ነፍሰነ ወሥጋነ ክርስቶስ ወልደ እግዚአብሔር፡፡ አምላክነ ወመድኃኒነ ኢየሱስ ክርስቶስ ተሣሃለነ፡፡ በብዝኃ ምሕረትከ ደምስስ አበሳነ ወፈኑ ሣህለከ ላዕሌነ ፡፡ እስመ እምኅቤከ ውእቱ ሣህል ሃሌ ሉያ መሐረነ አብ መሐሪ፡፡ ወተሣሃለነ ሀብ ሣህለከ መሐሪ ኢታጥፍአነ ተዘኪረከ ዘትካት፡፡ በምሕረትከ እስመ መሐሪ አንተ ወብዙኅ ሣህልከ ለኲሎሙ እለ ይጼውዑከ ፡ ይጼውዑከ በጽድቅ ሰማዒ ወትረ ከሃሊ ዘውስተ አድኅኖ ፡፡ ከሃሊ ዘውስተ አድኅኖ ለአምላክነ እስመ ጽድቅ ቃሉ፡፡ ንስአሎ ለአብ ይፈኑ ለነ ሣህሎ እስመ አብ የአክል ለዘሰአሎ፡፡

ሃሌ ሉያ ስብሐት ሎቱ ይደሉ ሃሌ ሉያ አኰቴት ሎቱ ይደሉ፡፡ ሃሌ ሉያ ለክርስቶስ ለእግዚአ ኲሉ ሃሌ ሉያ ሃሌ ሃሌ ሉያ፡፡ ወይእዜኒ መኑ ተስፋየ አኮኑ እግዚአብሔር ውስተ እዴከ እግዚኦ አማኅፀን ነፍስየ፡፡ ኅበ አምላከ ምሕረት አማኅፀን ነፍስየ ፡፡ ኅበ ንጉሠ ስብሐት አማኅፀን ነፍስየ፡፡ በእግዚእየ ወአምላኪየ አማኅፀን ነፍስየ ፡፡ እምኩሉ ምግባረ እኩይ አድኅና ለነፍስየ፡፡ ሀቡ ንስአሎ ንስአሎ ናስተምህሕሮ ለአምላክነ ጻድቅ እስመ ጽድቅ ቃሉ ፡፡ ዘይክል ኲሎ ወአልቦ ዘይሰአኖ፡፡

አምላከ ነዳያን ረዳኤ ምንዱባን ንሕነ ኅቤከ ተማኅፀነ፡፡ ዘይክል ኲሎ ወአልቦ ዘይሰአኖ፡፡ አምላከ ነዳያን ናዛዜ ኅዙናን ንሕነ ኅቤከ ተማኅፀነ ፡፡ ዘይክል ኲሎ ወአልቦ ዘይሰአኖ፡፡ አምላከ ነዳያን ናዛዜ ኅዙናን ንሕነ ኅቤከ ተማኅፀነ፡፡ ዘይክል ኲሎ ወአልቦ ዘይሰአኖ፡፡ አምላከ ነዳያን ወተስፋ ቅቡፃን ንሕነ ኅቤከ ተማኅፀነ ፡፡ ወበከመ ዐቀብከነ እምሠርክ እስከ ነግህ ዕቀበነ እግዚኦ እምነግህ እስከ ሠርክ (፫ጊዜ በል )::

ተሣህልከ እግዚኦ ምድረከ ሃሌ ሉያ ስማዕ ጸሎተነ ወስእለተነ ወሥረይ ኲሎ ኃጢአተነ ስማዕ ጸሎተነ ወስእለተነ ዘሰማዕኮ ጸሎቶ ወስእለቶ ለዕዝራ ተወከፍ ምሕላነ ሰላመከ ሀበነ እማእከሌነ ኢትርሃቅ፡፡ ወሚጥ መዐተከ እምኔነ ሃሌ ሉያ ንዒ ኅቤየ እንቲአየ ሠናይት ርግብየ መዓዛ አፋሃ ከመ ኮል ወኲሉ ነገራ በሰላም፡፡ አርእየነ እግዚኦ ሣህለከ ሃሌ ሉያ ሰአል ለነ ጊዮርጊስ ኅበ እግዚአብሔር ወጸሊ በእንቲአነ ሀረድዎ ወገመድዎ ወዘረው ሥጋሁ ከመ ሐመድ ወወሰድዎ ኅበ ሰብአ ነገሥት ረገጸ ምድረ አንሥአ ሙታነ አባ ጊዮርጊስ በሰላም ዐደወ መንግስተ ክብር ወረሰ፡፡ መልአከ ሰላምነ ሊቀ መላእክት ሚካኤል ሰአል ወጸሊ በእንቲአነ አዕርግ ጸሎተነ ቅድመ መንበሩ ለንጉሥ አብይ፡፡

ገብርኤል አብሠራ ለማርያም ወይቤላ ትወልዲ ወልደ ወይነግሥ ለቤተ ያዕቆብ ለዓለም ወአልቦ ማኅለቅት ለሰላሙ፡፡ ማኅደረ ሰላምነ ቅድስት ደብተራ እሞሙ ለሰማዕት ወእኅቶሙ ለመላእክት ንዑ ንስግድ ኲልነ ኅበ ማርያም እምነ፡፡ ባርከኒ አባ እንሣእ በረከተከ በእንተ ሰላማ ለቅድስት ቤተክርስቲያን ሳሙኤል አባ ባርከኒ እንሣእ በረከተከ፡፡ ለዓለም ወለዓለመ ዓለም ሃሌ ሉያ ሰላመ አብ ወሰላመ ወልድ ወሰላመ መንፈስ ቅዱስ የሃሉ ማእከሌክሙ አኃው፡፡