ተፈስሂ ማርያም ድንግልተ ሥጋ

ተፈሥሒ ማርያም ድንግልተ ሥጋ ወሕሊና ተፈሥሒ ማርያም ወለተ ኢያቄም ወሐና ጳጦስ አንቲ ዘአስተርአይኪ በደብረ ሲና ጐሞረ ወርቅየ መስፈርቱ ለመና ማርያም ለዕበይኪ ይደሉ መሐና።

ተፈሥሒ ማርያም ድንግልተ ኀሊና ወሥጋ ተፈሥሒ ማርያም እንበለ ሕፀጽ ወንትጋ ተፈሥሒ አንቀጽ ዘኢትርኀወ መንሠጋ ለነፍሰ ዚኦየ ውስተ ሲኦል ኢይኀድጋ ፍሬ ማኀፀንኪ ወልድ ይክፍለኒ ጸጋ ኀበ ይገብሩ ኀሩያን እንግልጋ።

ተፈሥሒ ማርያም ይደልወኪ ተፈሥሖ ተራኀርኂ ድንግል ዘልማድኪ ተራኀርኖ ገብርኪ ኃጥእ ሶበ ጸራሕኩ በከልሖ ለቃለ አፉየ ተወኪፈኪ ጽራሖ ኦሆ ኦሆ በልኒ ኦሆ ለቤተ መርዓ እሁበከ መርኖ።

ተፈሥሒ ማርያም ወለተ ሳራ ወርብቃ ተፈሥሒ ማርያም ለደወለ ርስት ማዕንቃ ለረዲኦትየ ፍጡነ እንዘ ትሰውጢ ከመ ባዜቃ ብጽሒ በኢጐንድዩ ኀበ ሀሎከ ጥቃ ከመ ተፈጽሚ ለልብየ ጻሕቃ።

ተፈሥሒ ማርያም እንተ አልብኪ ምሳሌ ተፈሥሒ ማርያም ታቦተ ኀርመት ወጽሌ ተፈሥሒ ጽሪት ዘዕፍረትየ ቢረሌ አስተበጽዕ አንሰ በጉባኤ ዘለኪ ድንጋሌ በኢውልዋሌ እንዘ ዕብል ዓሌ አንገፍኒ በተንባሌ እምብካይ ወወይሌ

ተፈሥሒ ማርያም ዘአክናፈ ንጽሕኪ ምንናታዌ ዘአምሠጥኪ ቅድመ እምቂአተ ሕምዙ ለአርዌ መጽሐፈ ብሥራት ይብሉኪ እለ ሀለው ምድረ ፄዋዌ መክፈልተ ርስትየ አንቲ ማርያም እነተ አልብኪ ምንሳዌ ዘፈለጠ ሊተ ኢያሱ ዘነዌ።

ተፈሥሒ ማርያም ወለተ አዳም ወሔዋ ተፈሥሒ ማርያም ሐዳስዩ ጣዕዋ ርጢነ መድኀኒት ወልድኪ ለቁስልየ ዘያሐይዋ ውቂዮ በሰይፍኪ ለፀርየ ነዋ ሰይጣን ስሙ ለነፍስየ ዕድዋ።

ተፈሥሒ ዕብለኪ ማርያም በከመ ገብርኤል መልአክ ቡርክት አንቲ እምአንስተ ወፍሬ ከርሥኪ ቡሩክ ለዕበየ ንግሥኪ ዘልፈ እንዘ እሰግድ በብረክ አመስጥ አንሰ በጽንዕኪ እምፀርየ ድሩክ ዘይፈቅድ ይንዐወኒ በጽባሕ ወሠርክ።

ተፈሥሒ ማርያም ሠርጐ አሮን ሌዋዊ ተፈሥሒ ማርያም ወለተ ዳዊት ሰንቃዊ ሙካፈ ስእለቱ ለኢዮብ አመ በቁስሉ ይደዊ ከመ ትኂጲዮ ለፀረየ ነፍሳተ ብዙኃን ነዓዊ በዲበ አብትር ቀስተኪ ቀስትዊ።

ተፈሥሒ ማርያም ዘኢየሐልቅ ትፍሥሕትኪ ተፈሥሒ ማርያም ዘኢቀብል መዝገብኪ ተፈሥሒ ማርያም ዘኢየሐጽጽ ዝክረ ውዳሴኪ ኢትመንንኒ ለገብርኪ ዘአጥረየን ወልድኪ እስመ አንቲ ሊተ ወአነ ዘለኪ።

በመኑ እትሜካሕ ማርያም ዘእንበሌኪ ምክሕየ ቀርነ መድኃኒትየ ብኪ ጸናዕኩ እመከርሠ እምየ ማርያም ጠረጴዛሁ ለቁርባነ ወንጌል ብዕልየ ውስተ እዴኪ ገደፍኩ ነፍስየ ወሥጋየ።

በመኑ እከብር ማርያም ዘንበሌኪ ክብረ ኵሉ ነቅዐ ምድር አንቲ ወጠለ ሰማይ ዘላዕሉ አንቲ ውእቱ ለዳዊት ሠርጐ አክሊሉ ብኪ እለተወከሉ ኢተኀፍሩ ወኢተኀጉሉ መገቦሙ ወመርሆሙ ወልድኪ በሣህሉ።

በመኑ እትፌሣሕ ማርያም ዘእንበለሌክ ፍሥሓ እንተ ወለድኪ መሲሐ ከመ አሐሊ ለከ ምሕረተ ወፍትሐ ሰበ እዜከር ርኀራኄኪ ንኀኑኀ ወዝኀዙኀ እምሐኬቱ ኀሊናየ ነቅሐ።

ኦ ፍጡነ ረድኤት ለጽኑዕ ወለድኩም ወለነፍስ ኵሉ ቃውም ጊዮርጊስ የዋህ እንበለ መሥፈርት ወአቅም ከመ እግዝእትከ ቡርክት ማርያም ርኀሩኀ ልብ አንተ እምበቀልወቂም

ኦ ፍጡነ ረድኤት በብዙኀ ጾታ ከመ እግዝእትከ ርግበ ኤፍራታ በሰማይ በላዕሉ ወበምድር በታሕታ አምሕለከ ጊዮርጊስ በስመ እምከ ቴዎብስታ ሞገሰ ስምከ ተህበኒ ከመ ስምከ መንታ

ኦ ፍጡነ ረድኤት እመሩጾተ ነፋስ ወዐውሎ ለዘይጼዉዐከ በተወክሎ ጊዮርጊስ ቅረብ ለምሕረት ወለተሣህሎ ተወከፍ ወትረ ጸሎትየ ወቃለ ጽራሕየ ኵሎ እስመ ልበ አምላክ ርኀሩኀ በኀቤከ ሀሎ

አፍጣኒተ ረድኤት ማርያም በጊዜ ምንዳቤ ወዐጸባ ለዐይን እምቀራንባ አንቲ ውእቱ ረዳኤተ ያዕቆብ በቤት ላባ በኵሉ ሕሊናሃ ወበኵሉ አልባባ ዘኢታፈቅርኪ ነፍስ ትሠሮ እምሕዝባ

ለዘኢያፈቅርኪ እግዝእትየ ውኩፈ ኢይኩን ጸሎቱ ይትገዘም ኑኀ ዓመቱ ወይጥፋእ በከንቱ በአፈ መላእክት ወሰብእ ይትረገም ለለዕለቱ ዘአስተማስሎ በተውኔት ለማህሌተ ስምኪ ዝንቱ ጌጋዩ ወኀጢአቱ ኢይትኀደግ ሎቱ

እሰግድ ቅድመ ማርያም ለዝክረ ስምኪ በጽዋዔ ወእሰግድ ካዕበ ለድንግልናኪ ክልኤ ወእሰግድ ሥልሰ ለሥዕልኪ ቅድመ ጉባኤ ዘኢሰገደሰ ለሥዕልኪ አስሪጾ ምማዔ በሥጋሁ ወበነፍሱ ኢይርከብ ትንሣኤ

ምንተኑ አዐሥየኪ ዕሴተ በእንተ ኵሉ ዘገበርኪ ሊተ ማርያም ሠናይት ዘታፈቅሪ ምሕረተ ሶበሰ ትትዐቀቢ ዘዚአየ ኀጢአተ እምኢሐየውኩ አሐተ ሰዓተ

በሰላመ ገብርኤል መልአክ እግዝእትየ ማርያም ሰላም ለኪ ድንግል በኀሊናኪ ወድንግል በሥጋኪ እመ እግዚአብሔር ጸባዖት ሰላም ለኪ ቡርክት አንቲ እምአንስት ወቡሩክ ፍሬ ከሥርኪ ተፈሥሒ ፍሥሕት ኦ ምልእተ ጸጋ እግዚአብሔር ምስሌኪ

ይካ ወካዕበ ናስተበቁዓ ለንግሥተ ኵልነ ማርያም እምነ ወእሙ ለእግዚእነ ወወድኀኒነ ኢየሱስ ክርስቶስ ንስእል ወነኀሥሥ ናስተበቁዕ ወንዌድስ ዕበየ ተአምራቲሃ ብዙኀ ለእመ ፀባዖት ንጉሥ እለ ትንብሩ ተንሥኡ ወእለ ታረምሙ አውሥኡ ማርያምሃ በቃለ ስብሐት ጸውዑ ቁሙ ወአጽምዑ ተአምረ ድንግል ከመ ትስምዑ።

ይዲ ጸልዩ ቅድመ ሥዕላ ለቅድስት ድንግል መርዐተ አብ ወአመ በግዑ ይሕ ቡርክ አንቲ ማርያም ቡርክት አንቲ ማርያም ወሠናይት አንቲ ማርያም ወቡሩክ ፍሬ ከርሥኪ መድኃኔ ኵሉ ዓለም

ይካ ንዑ ንስግድ ወንግነይ ላቲ ንዑ ንትፈሣሕ ወንትሕሠይ ባቲ እስመ እመ አምላክ ይእቲ ድንግልናቲሃ ክልኤቲ ዛቲ ይእቲ ትንቢቶሙ ለነቢያት ሞገሰ ስብከቶሙ ለሐዋርያት እሞሙ ለሰማዕት ወእኀቶሙ ለመላእክት ላቱ የደሉ ክብር ወስብሐት ወለወልዳ ሰጊድ ወአምልዛት በምድረ ወበሰማያት በባሕር ወበቀላያት ለዓለመ ዓለመ ይሕ አሜን።