ተፈስሂ ማርያም ለአዳም ፋሲካሁ
ተፈሥሒ ማርያም ለአዳም ፋሲካሁ ወማዕዶታ ለሔዋን እንተ ይእቲ ዐጽሙ ገቦሁ እስመ ግዕዛኖሙ ኮነ ለወልድኪ በትንሣኤሁ በወርኀ እብሬትኪ እግእትየ ዘኢይትረከብ ከማሁ መኑ ዘይቴክዝ ወመኑ ዘይላሑ
ተፈሥሒ ማርያም ወለተ አሮን ወሙሴ ዘትትቄጸሊ አብያዘ ወትሤአኒ ብናሴ ለኃይለ ተአምርኪ ዝንቱ ሶበ ናቄርብ ውዳሴ ኀትሚ ፍጽመ ዚአነ በማኀተመ ቅድስት ሥላሴ አርእስተ ዐቃርብት ንኪድ ወንቀጥቅጥ ከይሴ
ተፈሥሒ ማርያም ወለተ ዳዊት ወወልዱ ጽጌ መዐዛ ዘዐርገ ለአብርሃም እምሥርወ ጉንዱ ያስተፌሥሐኒ ጥቀ ዜና ተአምርኪ ለለአሐዱ አይሁድሰ ሶበ መንክራተኪ ክሕዱ ሕያዋኒሆሙ ሲኦለ ወረዱ
ነአኩተኪ ማርያም ወንስብሓኪ ወትረ ሠርከ ወነግህ ኵሎ አሚረ እምኃየል ተአምርኪ ዝንቱ ሶበ ንሬኢ ኀቡረ ለልበ ጠቢባን መላእክት ዘያረስፆሙ ምክረ ወለሕፃናት ይከስት ስውረ አአኩተኪ ማርያም ወሃቢተ ጸጋ በከንቱ እስመ አልዐልከኒ ሊተ እመሬተ ምድር ወእምታሕቱ እንሥኦተ ነዳይሰ ወአልዕሎ ምስኪን ጊዜ ድቀቱ እወ እወ ለልብኪ ከመ ከማሁ ሥምረቱ እወ ለዘኒ ፈቀድኪ ታሠንዪ ሎቱ
ጽብዒ ማርያም እለ ይጸብኡኒ በተኀብሎ ወግፍዒ ካዕበ እለ ይገፍዑኒ ኵሎ ተአምረኪ ታርእዪ ወለወልድኪ በቀሎ ይብል አብድ አኮኑ እግዚአብሔር ኢሀሎ ሶበ ላዕሌሁ ፍጡነ ኢያርአየ ኃይሎ፡፡
ንዒ ማርያም ምስለ ወልድኪ መዋዒ ከመ ታውድቂ ፍጡነ ርእስ ፀረ ወጸላኢ እስመ ፈታሒት አነቲ ማእከለ ግፍዕ ወገፋዒ ብፁዕ ብእሲ ድቀተ ፀሩ ዘይሬኢ ወብፁዕ ካዕበ ፍትሐኪ ሰማዒ
ዝውእቱ እድሜ ሣህልኪ ወዘተአምርኪ ጊዜ ማርያም ድንግል ምልዕተ ምሕረት ከመ ተከዜ እስከ ማእዜኑ እሄሉ ማዕከለ ብካይ ወእንባዜ ኦ ናዛዚት እንተ ወለድኪ ናዛዜ ኦ ንግሥት ባቋዒት ብቍዕኒ ይእዜ
ሙሴ ነቢይ አመ ሕዘቢሁ ቁስሉ ተአምር ገብረ ለአርዌ ብርት በምስሉ እምዝኒ የዐቢ ኃይለ ተአምርኪ ንግሥተ ኵሉ ወኀበ ተተክለ ለዋሕድኪ መስቀሉ ሥራዊተ ደዌ ወሞት ቀሪበ ኢይክሉ
ፈሪሆትኪ ማርያም ቀዳሜ ኵሉ ተዐውቆ ወአፍቅሮትኪ ካዕበ መሠረተ ጥበብ ወአጠይቆ ተአምረኪ እሴብሕ በቃል መዝሙር ወመሰንቆ በውስተ ተአምርኪ እግዝእትየ ለዘአብአ ናፍቆ አፍትዎ መዊተ ወሲኦለ አጽሐቆ
ምንተ ረከቡ ካህናተ ሐሊባ ወሀላ መንክራተ አምላክ ዘርእዩ እምስኪኖን እስከ ጌልጌላ ካህናተ ቤትኪሰ ማርያም ርግበ ገሊላ እንዘ ይትአመኑ ለተአምርኪ ኃይላ ያፈልሱ ደብረ ወይመልሑ ሰገላ
ይቴክዝ አብድ ሶበ ልበ ጥበብ ውሕዶ በኢያእምሮቱ አብዝኀ ሕማመ ዘይፈደፍዶ ፍሡሕሰ ለፍቅርኪ ዘይፀመዶ በቅድመ ሥዕልኪ እግዝእትየ ለለ ጊዜ ያነሥእ እዶ ተስፋሁ ይረክብ ወይፈጽም መፍቅዶ
ዕቀብኒ በተአምርኪ ወአድኀንኒ እምእማቴ በከመ አድኀኖ ወልድኪ ለዮናስ ወልደ አማቴ መዋዕለ ዕረፍት አንቲ ማርያም ጰንጠቆስቴ እምኀይለ ድካም ያጸንዕ መዋቴ ኀብስት ስብሐትኪ ወፍቅርኪ ስቴ፡፡
ሴስይኒ ማርያም ለጸማድኪ አሳብ ኀብስተ አእምሮ ሠናየ ወወይነ ጥበብ እምኒ ፈድፈደ ኀጢአትየ እምሕዝብ ተዘከሪ እግዝእትየ ብረኀራኄኪ ዕፁ፡፡ብ ከመ አስተኪዮ ማየ ለጽሙዕ ከልብ
ኦ ፍጡነ ረድኤት ለጽኑዕ ወለድኩም ወለነፍስ ኵሉ ቃውም ጊዮርጊስ የዋህ እንበለ መሥፈርት ወአቅም ከመ እግዝእትከ ቡርክት ማርያም ርኀሩኀ ልብ አንተ እምበቀልወቂም
ኦ ፍጡነ ረድኤት በብዙኀ ጾታ ከመ እግዝእትከ ርግበ ኤፍራታ በሰማይ በላዕሉ ወበምድር በታሕታ አምሕለከ ጊዮርጊስ በስመ እምከ ቴዎብስታ ሞገሰ ስምከ ተህበኒ ከመ ስምከ መንታ
ኦ ፍጡነ ረድኤት እመሩጸተ ነፋስ ወዐውሎ ለዘይጼዉዐከ በተወክሎ ጊዮርጊስ ቅረብ ለምሕረት ወለተሣህሎ ተወከፍ ወትረ ጸሎትየ ወቃለ ጽራሕየ ኵሎ እስመ ልበ አምላክ ርኀሩኀ በኀቤከ ሀሎ
አፍጣኒተ ረድኤት ማርያም በጊዜ ምንዳቤ ወዐጸባ ለዐይን እምቀራንባ አንቲ ውእቱ ረዳኤተ ያዕቆብ በቤት ላባ በኵሉ ሕሊናሃ ወበኵሉ አልባባ ዘኢታፈቅርኪ ነፍስ ትሠሮ እምሕዝባ
ለዘኢያፈቅርኪ እግዝእትየ ውኩፈ ኢይኩን ጸሎቱ ይትገዘም ኑኀ ዓመቱ ወይጥፋእ በከንቱ በአፈ መላእክት ወሰብእ ይትረገም ለለዕለቱ ዘአስተማስሎ በተውኔት ለማህሌተ ስምኪ ዝንቱ ጌጋዩ ወኀጢአቱ ኢይትኀደግ ሎቱ
እሰግድ ቅድመ ማርያም ለዝክረ ስምኪ በጽዋዔ ወእሰግድ ካዕበ ለድንግልናኪ ክልኤ ወእሰግድ ሥልሰ ለሥዕልኪ ቅድመ ጉባኤ ዘኢሰገደሰ ለሥዕልኪ አስሪጾ ምማዔ በሥጋሁ ወበነፍሱ ኢይርከብ ትንሣኤ፡፡
ይካ ወካዕበ ናስተበቁዓ ለንግሥተ ኵልነ ማርያም እምነ ወእሙ ለእግዚእነ ወወድኀኒነ ኢየሱስ ክርስቶስ ንስእል ወነኀሥሥ ናስተበቁዕ ወንዌድስ ዕበየ ተአምራቲሃ ብዙኀ ለእመ ፀባዖት ንጉሥ እለ ትንብሩ ተንሥኡ ወእለ ታረምሙ አውሥኡ ማርያምሃ በቃለ ስብሐት ጸውዑ ቁሙ ወአጽምዑ ተአምረ ድንግል ከመ ትስምዑ።
ይዲ ጸልዩ ቅድመ ሥዕላ ለቅድስት ድንግል መርዐተ አብ ወአመ በግዑ ይሕ ቡርክ አንቲ ማርያም ቡርክት አንቲ ማርያም ወሠናይት አንቲ ማርያም ወቡሩክ ፍሬ ከርሥኪ መድኃኔ ኵሉ ዓለም
ይካ ንዑ ንስግድ ወንግነይ ላቲ ንዑ ንትፈሣሕ ወንትሕሠይ ባቲ እስመ እመ አምላክ ይእቲ ድንግልናቲሃ ክልኤቲ ዛቲ ይእቲ ትንቢቶሙ ለነቢያት ሞገሰ ስብከቶሙ ለሐዋርያት እሞሙ ለሰማዕት ወእኀቶሙ ለመላእክት ላቱ የደሉ ክብር ወስብሐት ወለወልዳ ሰጊድ ወአምልዛት በምድረ ወበሰማያት በባሕር ወበቀላያት ለዓለመ ዓለመ ይሕ አሜን።